+7 (777) 001 44 99
ПОДЕЛИТЬСЯ
"Астана" баскетболшылары үшінші рет Қазақстан чемпионы атанды. Олар финалда Атыраудың "Барсы" клубынан басым түсті, деп хабарлайды Tengrinews.kz.
"Астана" баскетболшылары үшінші рет Қазақстан чемпионы атанды. Олар финалда Атыраудың "Барсы" клубынан басым түсті, деп хабарлайды Tengrinews.kz.
Биылғы ел чемпионатының финалында "Астана" мен "Барсы" кездескен болатын. Финалдық дода үш жеңіске дейін созылуы тиіс-тін. Халықаралық "ВТБ бірегей лигасында" шыңдалған, деңгейі жоғары "Астана" көп созбалаған жоқ. Алғашқы үш ойында Атырау клубын тізе бүктіріп, биыл да саф алтынды өңірлерінде жарқыратты. Атырау баскетболшылшыларына бұйырғаны күміс медаль болды.
Алғашқы екі ойын елордада өткен. "Астана" 90:61 және 87:65 есептерімен екеуінде де үстемдік танытты. Үшінші ойынның ысқырығы Атырауда безілдеді. "Астана" Жайық жағасында да қарсыластарына дес бермеді. 73:64 есебімен жеңіске жетіп, саф алтынға қол жеткізді.
Бір қызығы, ел чемпионатының қола жүлдегер әлі анықталған жоқ. Үшінші орын үшін додаға түсіп жатқан "Каспий" (Ақтау) және "Қапшағай" (Талдықорған) клубтары әзірше екі-ақ ойын өткізді. Жалпы есеп – 1:1, таразы басы тепе-тең.
Жетісу төрінде өткен екі ойынның біріншісінде Каспий жағалауынан келген клуб 95:87 есебімен басымдық танытты. Екіншісінің негізгі уақыты тең аяқталып, овертаймда "Қапшағай" баскетболшыларының бақтары жанды. Есеп – 88:84.
Енді командалар Талдықорғаннан Ақтауға барады. Келесі екі ойын 25 және 26 сәуір күндері Каспий жағасында өтеді.
