29 қаңтар 2017 19:29

Универсиада-2017 ашылу салтанаты өтті

ПОДЕЛИТЬСЯ

Бүгін, 29 қаңтарда "Алматы Арена" мұз айдынында Нұрсұлтан Назарбаевтың қатысуымен XXVIII Халықаралық қысқы Универсиадасының ашылу салтанаты өтті, - деп хабарлайды Тengrinews.kz тілшісі. 


Бүгін, 29 қаңтарда "Алматы Арена" мұз айдынында Нұрсұлтан Назарбаевтың қатысуымен XXVIII Халықаралық қысқы Универсиадасының ашылу салтанаты өтті, - деп хабарлайды Тengrinews.kz тілшісі. 

Ашылу салтанатында Қазақстан Президенті Нұрсұлтан Назарбаев салтанатты іс-шараға қатысушыларды Алматыдағы ғаламат спорт мерекесінің басталуымен құттықтады.

"Бұл стадионда жер шарындағы жетекші жоғары оқу орындарының жүздеген өкілдері жиналып отыр. Сіздердің араларыңызда болашақ олимпиадашылар мен әлемдік сайыстардың жеңімпаздары бар. Сондай-ақ, өзінің мансабын келешекте экономикамен, саясатпен, бизнеспен байланыстыратындар да жоқ емес", - деді Қазақстан Президенті.

Нұрсұлтан Назарбаев тәуелсіздіктің алғашқы күндерінен бастап еліміздің ұстанымы бірлік пен ынтымақтастық орнату, қауіпсіз болашаққа ұмтылыс болғанын атап өтті.

"Спорт, ғылым және мәдениет арқылы біз барлық құрлыққа тыныштық пен толерантты дамудың қазақстандық формуласын жеткізгіміз келеді. Сол үшін ұйымдастыру жұмыстары күн сайын қарқын алып, осы Мұз сарайы мен бұл ойындардың басқа да нысандары зор ықыласпен салынды", - деді Мемлекет басшысы.

Сондай-ақ, Қазақстан Президенті Универсиада қаланың спорт инфрақұрылымын дамытудың өзіндік локомотивіне айналғанын атап өтті.

"Алматы қазірдің өзінде даусыз рекордтар көрсетіп отыр. Қысқы Универсиадалар тарихында алғаш рет мұнда Атлеттер қалашығы салынды. Бұл жобаға жұмсалған инвестиция қазақстандықтардың игілігіне қызмет ететін болады. Ареналар көпшілікті бұқаралық спортқа тартатын орталыққа айналады. Атлеттер қалашығы 1700-ден астам отбасыға арналған қолжетімді әлеуметтік тұрғын үйі бар жаңа шағын ауданды құрайды. Универсиада әлемнің 80 мемлекетінде 43 телеарна арқылы көрсетіледі. Оның аудиториясы бір миллиардтан астам адамды қамтиды. Универсиаданың қанатын кеңге жайғанын, өзінің басталуының тарихи сәтіне дайын екенін көріп отырмыз", - деді Нұрсұлтан Назарбаев.

Сондай-ақ, Мемлекет басшысы Универсиада өтіп жатқан орынның бірегейлігіне назар аударды.

"Алматы - 1000 жылдық тарихы бар қала, Қазақстанның жаңа дәуірі бастау алған алтын бесік. Бұл - қарқынды дамып келе жатқан, заманауи қала, іскерлік орталығы және ел экономикасының қозғаушы күші. Жастар қаласы. Студенттер қаласы. Қазақстанның жоғары оқу орындарының үштен бірі осында орналасқан, оларда 137 мың студент білім алуда. Аты аңызға айналған және бәріміз жақсы көретін "Медеу" мұз айдыны бұрынғы даңқын қайта жаңғыртып, қайтадан ауқымды жарыстардың атмосферасын сезіндіретін болады. Іле Алатауы бөктерінде «Шымбұлақ» алмастай жарқырап тұрады. Универсиада саламатты өмір салтының рәмізіне айналады. Оның нәтижесін ұлтымыздың денсаулығын нығайту жөніндегі мемлекеттік бағдарламалармен салыстыруға болады", - деді Қазақстан Президенті.

Нұрсұлтан Назарбаев жарысты ұйымдастыруға қолдау көрсеткені үшін осы жаһандық мерекені әзірлеуге атсалысқандардың бәріне, соның ішінде үш мың волонтерге, Халықаралық студенттік спорт федерациясына және оның президенті О.Матыцинге алғыс білдірді.

Салтанатты шарада мәдени-ойын-сауық бөлімдері бар. Шара 2 сағат 40 минутқа жалғасады. Универсиаданы өткізген елдердің туларын Ұлттық ұланның офицерлері халықаралық конкурстардың жеңімпаз балаларымен бірге алып шықты. Олар Қазақстан Республикасының әнұранын орындады.

12 мың орындық "Алматы-Арена" мұз сарайының орталығы өмірдің, даналықтың және махаббаттың символы іспетті жапырақтармен көмкерілген.

Ашылу барысында құрама командаларының дәстүрлі шеруі өтеді. Шеру кезінде 57 елдің делегациясы жүріп өтеді. Қазақстандық құраманың ту ұстаушысы - шаңғышы Дәулет Рахымбаев. 

Спортшылардың атынан адал тартыс қамтамасыз етуге ант беретін қазақстандық мәнерлеп сырғанаушы - Айза Иманбек. FISU туын спортшылар Василий Подкорытов, Данияр Елеусінов, Әділет Даулумбаев, Динара Сәдуақасова, Екатерина Айдова, Мариани Урдабаева ұстайды.

Жалпы шараға 1,5 әртіс қатысады: олардың ішінде опера және эстрада әншілері, цирк гимнасттары, спорт мектептерінің мәнерлеп сырғанаушылары, би ұжымдары, Алматы театрларының актерлері және басқалар.

Еске салайық, 25 қаңтарда Қазақстанда Эстафета алауы бастау алған. Факелды алып жүру рәсімі Астанада 25 қаңтарда басталды. Спорт ойындарының бастамасы болып қалыптасқан от алып жүру рәсімі еліміздің барлық өңірінде өткізілді. Соңында алау Алматыға жеткізіліп, Алматы Аренада салтанатты ашылу рәсімінде жағылды. XXVIII Халықаралық қысқы Универсиада ресми түрде ашылу салтанаты 29 қаңтарда сағат 19:00-де басталады. Қазақстанның атынан спорттың 12 түрінен 171 спортшы қатысады.

Универсиаданың толық күнделігін мына жерден көре аласыз. Сонымен қатар, спорттық нысандарға автобус арқылы қалай жетуге болатыны туралы да мына жерде жазылған. 

Читайте также
Join Telegram
Тоқаев Қытайға барады

Валюта бағамы

 448.12   483   4.85 

 

Ауа райы

 

Редакция Жарнама
Социальные сети