АҚШ әуежайында жолаушылар мінген ұшақтан өрт шықты

Бейсенбі күні кешке Денвер халықаралық әуежайында бортында жолаушылар отырған American Airlines ұшағы өртенді, - деп хабарлайды Tengritravel.kz тілшісі Fox News-ке сілтеме жасап.

Әуекомпаниясының өкілі телеарнаға берген мәлімдемесінде ұшақтың Колорадо-Спрингстен шығып, Даллас/Форт-Уэрт халықаралық әуежайына бағыт алғанын, алайда Денверге мәжбүрлі түрде қонуға тура келгенін айтты.

Ұшақ қонғаннан кейін жолаушыларды түсіруге дайындалып жатқанда, "қозғалтқышқа байланысты мәселе туындап", өрт шыққан. Оқиға жергілікті уақыт бойынша шамамен 18:00-де болған.

"Ұшақтағы 172 жолаушы мен 6 экипаж мүшесі эвакуацияланып, терминалға жіберілді, – делінген әуекомпания мәлімдемесінде. – Біз экипаж мүшелеріне, Денвер әуежайының қызметкерлеріне және төтенше жағдай қызметтеріне барлық жолаушылар мен әуежайдағы адамдардың қауіпсіздігін қамтамасыз етуге бағытталған жылдам әрі батыл әрекеттері үшін алғысымызды білдіреміз".

Әуежай өкілінің мәліметінше, әуе кемесі C38 шығыс қақпасында өренген.

Жарияланған видеокадрларға қарағанда, эвакуация кезінде жолаушылар ұшақ қанаты арқылы шығарылған, ал ұшақтан қою түтін шығып жатқан.

Өрт сөндірілген, зардап шеккендер жоқ. Өрттің нақты себебі әлі анықталған жоқ.

Саяхат қызықтары мен пайдалы ақпаратты Instagram және Facebook парақшаларынан оқи аласыз!