Таиландтағы жер сілкінісі: қазір онда қанша қазақстандық бар?

Таиландта қанша қазақстандық турист бар екені белгілі болды, - деп хабарлайды Tengrinews.kz тілшісі.

Қазіргі уақытта Таиландта шамамен 4,5 мың қазақстандық турист бар, олар ұйымдастырылған турлар арқылы барған. Бұл туралы "Туристік Қамқор" қорының өкілдері мәлімдеді. Ұйымның мәліметінше, Бангкокта қазақстандық туристер жоқ.

"Қолымыздағы ақпарат бойынша, Бангкокта біздің туристеріміз жоқ. Қазіргі уақытта жалпы алғанда шамамен 4,5 мың қазақстандық Таиландта демалып жатыр. Олар туроператорлардың бақылауында, сондықтан бұл мәселеге алаңдаудың қажеті жоқ", – деп хабарлады қордың өкілі.

Сонымен қатар, жергілікті гидтер туристерге қауіпсіздік шаралары туралы нұсқаулықтар беріп, қажет болған жағдайда қолдау көрсетуге дайын.

"Олардың жанында тайлық гидтер бар, олар туристерге сақтық шараларын түсіндіреді. Егер қандай да бір жағдай туындаса, олар бізге немесе туроператорларға жүгінеді", – деп атап өтті ұйым.

Жағдайдың күрделенгеніне қарамастан, туристерден көмек сұраған немесе турларын ауыстыруға өтініш білдірген ешкім жоқ.

"Қазіргі уақытта бізге туристерден ешқандай көмек сұрау туралы өтініш түскен жоқ. Сондай-ақ, турлардың күшін жою немесе мерзімін өзгертуге қатысты да сұраныстар болған жоқ. Егер жағдай қауіп төндіретіндей деңгейге жетсе, туроператорлар өздері рейстерді тоқтатып, билеттер сатылымын шектейді", – деп мәлімдеді қор өкілдері.

Туроператорлар Таиландтағы жағдайды жіті бақылап, туристерге қажетті ақпарат пен қолдау көрсетіп жатыр.

"Таиландтағы жағдайды қазақстандық туроператорлар мұқият қадағалап отыр. Олар туристік аймақтардағы жағдайды бақылай отырып, қажетті ақпаратты уақтылы жеткізіп, барлық шараларды қолға алып отыр", – деп қосты ұйым өкілдері.

Сілтемесіз жаңалық оқисыз ба? Онда Telegram желісінде парақшамызға тіркеліңіз!