Түркия курорттарында туристерге жаңа тыйым енгізіледі

Түркияның Жерорта теңізі жағалауында демалуды жоспарлап отырған туристерге ойлануға тура келеді. 5 маусымнан бастап Антальяда темекі шегуге толық тыйым салынады, - деп хабарлайды Tengri Travel.

Тыйым қай жерлерде енгізілді?

Hurriyet Daily News мәліметінше, жаңа ережелер әзірге төрт танымал орынға - Лара, Белек, Чамьюва және Beach Park-қа қолданылады. Қазірше бұл шара Мәдениет және туризм министрлігінің басқаруындағы жағажайларға қатысты, бірақ алдағы уақытта "түтінсіз" аймақтар тізімін кеңейту жоспарланған.

Шектеулердің енгізілу себебі

Бұл шешім Акдениз университетінің зерттеулері теңіз түбінде темекі тұқылының қорқынышты мөлшерін анықтағаннан кейін қабылданды.

"Теңіз түбінің түсірілімдері алғашында теңіз ағзалары немесе губкалар деп ойлаған нысандардың шын мәнінде үйілген темекі тұқылдары екенін көрсетті", - деді жоба үйлестірушісі Эбру Шахин.

Ол темекі тұқылдарының құм мен малтатас арасына жиналып, кейін ағыспен ашық теңізге шығатынын, осылайша экожүйеге орны толмас зиян келтіретінін айтты. Бұл бастама теңіз флорасы мен фаунасын қорғап қана қоймай, жағажайларды балалы отбасылар үшін жайлырақ етіп, оларды екінші реттік темекі түтінінің әсерінен қорғауға бағытталған.

Әрі қарай не болды?

Жаңа шара Антальяның экологиялық стратегиясының бір бөлігіне айналды. Қалада ауыз суды тегін толтыру станциялары орнатылып, қайта өңдеуге арналған ыдыс қабылдайтын автоматтар желісі кеңейтіліп жатыр. Тұрғындар мен туристер көп реттік бөтелкелерді тегін толтыра алады деп күтіледі, бұл бір реттік пластикті пайдалануды азайтуға мүмкіндік береді.

Жобаға Түркияның Денсаулық сақтау министрлігі де қолдау көрсетіп отыр. Елде темекі шегуден азат аймақтарды барлық қоғамдық орындарға дейін кеңейтуді қарастыратын заң жобасы әзірленіп жатыр. Түрік БАҚ-тары мәліметінше, құжат тиісті ведомстволармен келісудің соңғы сатысында тұр. Елдің жаһандық мақсаты өте өршіл: 2040 жылдың 1 қаңтарына қарай республика аумағында темекі өнімдерін сатуды толығымен тоқтату.