“Жүргізуші куәлігі 170 мың теңге“: алаяқ үш қазақстандықтан ақша алып, жоғалып кеткен

Қазақстандықтар емтихан тапсырмай жүргізуші куәлігін алғысы келіп, алаяқтың құрығына түсті, деп хабарлайды Tengri Auto.

Не болды?

Меркі аудандық сотының мәліметінше, сотталушы М. таныстарына емтихансыз куәлік алуға көмектесе алатынын айтқан. 2025 жылдың тамызында ол үш адамды сендіріп, жоқ қызметі үшін олардан 770 мың теңге алған.

Бұл ретте ол әркімге әртүрлі баға қойған: екі жәбірленушіден 300 мың теңгеден, ал үшіншісінен 170 мың теңге алған. Кейін анықталғандай, ол ақшаны өз қажеттілігіне жұмсап, байланысқа шығуды қойған.

Сот шешімі

Прокурор сотталушыны 2 жыл 6 айға бас бостандығынан айыруды сұрады. Күнәсін мойындаған сотталушы алаяқтыққа қарыздарының кесірінен барғанын түсіндірді. Ол шығынды толық өтеп берген, ал жәбірленушілер сотталушымен татуласқандарын және оған ешқандай талап-арыздары жоқ екенін мәлімдеген.

Сот бұл жағдайларды жеңілдететін мән-жайлар деп танып, оған пробациялық бақылау орнатумен 3 жыл мерзімге бас бостандығын шектеу жазасын кескен.

Үкім заңды күшіне енді.