ПОДЕЛИТЬСЯ
Қазақстанда автокөліктерді бейресми арналар арқылы әкелу кезіндегі алаяқтық жағдайлар жиілеп кетті. Бұл туралы Үкімет отырысында Қазақстан автокөлік одағының президенті Анар Мақашева мәлімдеді, - деп хабарлайды Tengri Auto.
Оның айтуынша, елге өзге мемлекеттерде кепілде тұрған, ұрланған деп есептелетін немесе басқа да құқықтық мәселелері бар көліктер келініп жатыр. Сонымен қатар, сатып алушыларда мұндай машиналардың тарихын алдын ала тексеру мүмкіндігі бола бермейді.
"Бүгінде отандастарымыз көлікті сатып алғаннан кейін осындай мәселемен бетпе-бет келіп, көп жағдайда көліксіз де, ақшасыз да қалып жатады", – дейді Анар Мақашева.
Ол мәселені шешу үшін мемлекеттік органдардың өзара іс-қимылын күшейту, цифрлық тексеру жүйелерін дамыту және күмәнді автокөліктерді Қазақстанға әкелгенге дейін анықтау үшін жасанды интеллект технологияларын пайдалану қажет екенін баса айтты.
Еске салайық: мамырда Грузияда халықаралық іздеуде жүрген 39 жастағы Қазақстан азаматы ұсталып, қамауға алынды. Полиция мәліметінше, ол бұған дейін Атыраудағы автосалондардың бірінде сату жөніндегі менеджер болып жұмыс істеген. Тергеу нұсқасы бойынша, ер адам сатып алушылардан көлік жеткізіп беруге уәде беріп ақша алып, бірақ сол қаражатты иемденіп кеткен.
Құқық қорғау органдары мәліметінше, ол 2022 жылдың тамызында екі көлік үшін алынған 37 миллион теңгені жымқырса, 2023 жылдың ақпанында дәл осындай жолмен тағы 81 миллион теңгені иеленген. Жалпы шығын көлемі 118 миллион теңгеден асты.
Пікірлерді оқу