Қазақстанда Ұлытау мен Қызылорда арасындағы тасжол құрылысы аяқталады

Ұлытау мен Қызылорда арасындағы жолды биыл толығымен пайдалануға беру жоспарланып отыр. Бұл туралы Мәжілістің жалпы отырысында премьер-министрдің бірінші орынбасары Нұрлыбек Нәлібаев айтты, деп хабарлайды Tengri Auto.

Оның айтуынша, былтыр Қызылорда – Жезқазған тасжолының 216 шақырымы аяқталды, ал биыл Ұлытау мен Қызылорда арасындағы жолды толық ашуға уәде беріліп отыр.

Сондай-ақ ай соңына дейін Қарағанды – Жезқазған тасжолының құрылысы басталуы тиіс. Бұл ұзындығы 575 шақырым болатын жол. Жоба құны 524 миллиард теңгеге бағаланып отыр. Жұмысты екі жыл ішінде аяқтау жоспарланған.

Жалпы, 2026 жылы Қазақстан бойынша 11 мың шақырымнан астам жол жөндеу жұмыстарымен қамтылады. Жұмыстар республикалық маңызы бар тасжолдарда да, облыстық және аудандық маңызы бар жолдарда да жүргізіліп жатыр.

Басқа да ірі жобалар қатарында ұзындығы 765 шақырым болатын Бейнеу – Сексеуіл жолының құрылысы бар. Оның құны 725 миллиард теңгеге бағаланып отыр.

Тағы оқыңыз: Тараз-Шымкент тасжолында орташа жылдамдықты асырғаны үшін қайта айыппұл салына бастайды