WBA, IBO, IBF және WBC тұжырымдары бойынша орта салмақта әлем чемпионы Геннадий Головкин жанкүйерлеріне өзіне келесі қарсыласты таңдап беруді ұсынды, - деп хабарлайды Vesti.kz.
"Жанкүйерлерім менің келесі жекпе-жегімде кімді көргісі келеді", - деп жазды Головкин твиттердегі ресми парақшасында.
Айта кетейік, 34 жастағы боксшы келесі кездесуін қыркүйек айында өткізуді жоспарлап отыр. Дегенмен оның қарсыласы кім болатыны әзірше белгісіз.
Бұған дейін, яғни кеше мексикалық Сауль Альварес WBC чемпиондық титулынан бас тартқан болатын. Нәтижесінде белбеу қазақстандық боксшыға берілді. Енді Альварес Головкинмен кездесуге міндетті емес.
