Астанада бір адамды пойыз басып кетті 14 сәуір 2014, 09:37
Астанада теміржолды кесіп өтпек болған адамды "Тальго" электр пойызы басып кетті, - деп хабарлайды Тengrinews.kz тілшісі ҚР Төтенше жағдайлар министрлігіне сілтеме жасап.
Қайғылы оқиға Алматы ауданындағы Астана - Сороковая теміржол өткелінде болды. "13.04.2014 күні сағат 22.08-де теміржолды белгіленбеген жерден кесіп өту кезінде ер адам Петропавл - Алматы бағытындағы №152 "Тальго" жолаушылар электр пойызының астына түсіп қалып, алған жарақатынан сол жерде қайтыс болды", - делінген министрліктің хабарламасында. Қазір марқұмның аты-жөні анықталып жатыр.
Еске салайық, сәуір айының басында Павлодарда жүк пойызы рельстің бойында ұйықтап жатқан ер адамның үстінен өтіп кеткен болатын. Үй-күйі жоқ адам аман қалды.
- ПОДЕЛИТЬСЯ