+7 (777) 001 44 99
Қазақша
Русский
English
Қазақша
Русский
English
ҚР ақпарат және коммуникациялар министрі Дәурен Абаев Астана тұрғындарының жаңа жұмыс кестесіне қатысты пікір білдірді, - деп хабарлайды Tengrinews.kz тілшісі.
Астана әкімдігіндегілер қала тұрғындарының жаңа жұмыс кестесін жариялаған болатын. Бұл туралы елорда әкімінің орынбасары Сергей Хорошун ҚР Сенатындағы үкімет сағатында айтқан еді.
"Өзгермелі жұмыс кестесі - кептелісті азайтудың бір жолы. Астана әкімдігіндегілер жұмыс кестесін тек кейбір мекемелерде арасына 10-15 минут уақыт салып өзгертсе, бұл кептелісті айтарлықтай азайтатын еді. Нәтижесінде біздің елордамыздың тұрғындарына бұл тиімді болады", - деді министр.
Ал Дәурен Абаев тұрғындарды Астана әкімдігінің бастамасына қолдау көрсетуге шақырды.
"Мен Президенттің баспасөз хатшысы болғанда, біз әлемнің көптеген елдерінде болдық. Бұл тәжірибе бүкіл әлемде - Токиода, Берлинде қолданылып жатыр. Мен Голландияда қызметкерлердің таңғы сағат 6-дан күндізгі сағат 3-ке дейін жұмыс істейтінін білемін. Олар сағат 3-те жұмыстан шығады. Қалған уақытта бос болады", - деді ведомство басшысы.
Құрылыс компанияларының жұмысының басталуын - 09.00-ден 07.00-ге; қалалық коммуналдық қызметтегілердің жұмыс кестесін - 09.00-ден 07.30-ға; қаржы институттары мен халыққа қызмет көрсету орталықтарының жұмыс кестесін - 09.00-ден 10.00-ге; ойын-сауық орталықтарының - 10.00-ден 10.30-ға; ұлттық компаниялардың жұмыс кестесін - 09.00-ден 09.30-ға ауыстыру ұсынылды. Сондай-ақ, республикалық басқарма органдары мен жергілікті атқарушы органдардың жұмысының басталуын - 09.00-ден 08.30-ға, білім беру мекемелерінің (колледждер мен ЖОО-лар) жұмыс кестесін - 08.00-ден 10.00-ге ауыстыру ұсынылып отыр.
Еске сала кетейік, осыған дейін Астана халқының жаңа жұмыс кестесіне қашаннан бастап ауысатыны белгілі болған еді. "Біз елордалық тұрғындарды жаңа жұмыс кестесіне 1 маусымнан бастап ауыстыруды жоспарлап отырмыз", - деп хабарлады Астананың Жолаушылар көлігі басқармасының басшысы Бекмырза Игенбердинов.
