Астанада соғыс адагерлері мен тыл еңбеккерлеріне көмек көрсетілді10 сәуір 2015, 13:23
@Тұрар Қазанғапов
Астанада Мемлекеттік кірістер департаменті қызметкерлері Жеңістің 70 жылдығына орай Ұлы Отан соғысы ардагерлері мен тыл еңбеккерлеріне көмек берді, - деп хабарлайды Tengrinews.kz тілшісі Мемлекеттік кірістер департаментінің баспасөз қызметіне сілтеме жасап. Қызметкерлер ардагерлердің қыс бойы аулада жиналған қарларын шығарып, үйлеріне жөндеу жұмыстарын жүргізген.
"Ұйымдастырылған акцияның басты мақсаты - Ұлы Отан соғысы ардагерлері мен тыл еңбеккерлеріне қамқорлық пен құрмет көрсету. Департамент қызметкерлерінің патриоттық сезімін ояту және азаматтарды үлкендерді сыйлауға шақыру" - делінген баспасөз хабарламасында.
"Бұл мен үшін ең үлкен көмек. Жас келген сайын дене еңбегіне жарамсыз болдық. Сондықтан ауладағы қарды шығару маған өте қиын", - деп соғыс ардагері Мұхтар Беркінбаев ризашылығын білдірді.
Астана қаласы бойынша Мемлекеттік кірістер департаменті бастығының орынбасары Серік Шаламбаевтың айтуынша, департамент қызметкерлерінің бұл бастамасы ұрпағының бейбіт өмірі үшін күрескен соғыс ардагерлеріне көрсетілген құрметтің ең аз ғана бөлшегі. "Біз үшін олардың көңіл-күйін көтеру өте маңызды", - деді ол.
Қазір елімізде Ұлы Отан соғысының бес мыңға жуық ардагері қалды. Еске сала кетейік, 70 жылдық мерекеге орай Ұлы Отан соғысы ардагерлері мен тыл еңбеккерлеріне жалпы сомасы 5,6 миллиард теңгеден асатын бір реттік материалдық көмек төленетінін хабарлаған болатынбыз. Ардагерлердің Астана мен Мәскеу қалаларында өтетін мерейтойлық шараларға баруы үшін бюджеттен тағы 61,8 миллион теңге бөлінеді.