Атырауда көпбалалы жалғызбасты әкеге үй берілді

23 Маусым, 11:14
0

Атырауда жалғызбасты әке қоныс тойын тойлады. Шиеттей 4 баласымен пәтер жағалап көшіп жүрген азамат баспаналы болды. Мұндай игі шара "Нұр Отан" партиясының "20 қайырымды іс" акциясы аясында жүзеге асты. Партия мүшесі Әлібек Семғалиев отбасына осындай керемет тарту жасады, - деп хабарлайды "Астана" телеарнасы.

Әйелі тұрмыстық қиындыққа шыдамай, балаларды күйеуіне тастап кетіп қалған. Содан бері жауапкершілік жүгін арқалаған азамат қаладағы екі балабақшада аула тазалаушы болып жұмыс істейді. 20 жыл бойы әркімнің баспанасын жалдап күнелтіп, пәтерден-пәтерге көшкен күндердің артта қалғанына шүкіршілік етеді.

"Депутат ағаларға көп рақмет айтамын. Жақсы игі іс істеп жатыр. Бұрын үй жалдап тұрдық әр жерде. Жататын жеріміз жоқ, ыңғайсыз. Қыздарым өсіп келе жатыр. Беріп отырған үй өте ыңғайлы", - деді Атырау қаласының тұрғыны Қайрат Әлипанов. 

Аймақта іссапармен жүрген елімізге танымал кәсіпкер Қайрат Құдайберген де қоныс тойға құтты болсын айта келді. Отбасына жұмсақ жиһазды сыйға тартатынын жеткізді. Қайратпен бірге жұмыс істейтін жандар да қарап қалмай, жаңа пәтерге тұрмысқа қажетті заттарын ала келіпті.

"Жақсы жұмыскер деп айта аламын. Балаға қамқор. 4 баласын өзі асырап отыр қазір. Бұл заманда анасыз баланы асырау қиын деп ойлаймын. Сондықтан да бұл кісі үйге лайықты деп ойлаймын. Себебі адамгершілігі мол адам", - деді №27 балабақша меңгерушісі Гүлайым Қашкенова.

Отбасындағы балалардың ең үлкені 16-да, кішісі 3 жаста. Ересектері әкесіне қолқанат. Үлгілі балғындар сабақты үздік оқиды. Олар үйді қалай жасақтайтынын, қай заттың қайда тұратынын да жоспарлап қойған.

Получить короткую ссылку


Нравится
Поделиться
Пікір қалдырыңыз
Оқылып жатыр
Талқыланып жатыр
Бүгін
Апта
Ай