1. Басты
  2. Біл
  3. Жаңалықтар
  4. Ел жаңалықтары

Қазақстан Бахрейнмен арада тауар айналымын жақсартуға мүдделі

Фото pressclub.kz сайтынан Фото pressclub.kz сайтынан

Бүгін Ақордада Қазақстан Президенті Нұрсұлтан Назарбаев Бахрейн Королі Хамад бен Иса әл-Халифамен кездесті, - деп хабарлайды Tengrinews.kz  тілшісі.

Мемлекет басшысы алдымен Қазақстанға алғаш рет ресми сапармен келген шейхке өз алғысын білдірді. "Сіздің осындай үлкен делегациямен (200-ге жуық адам - авт.) келуіңіз ізгі ниетіңіздің бар екендігін көрсетсе керек. Бүгін біз біраз мәселелерді талқылап шықты. Негізі, Бахрейн біз үшін Парсы шығанағындағы маңызды әріптестердің бірі. Сондықтан Қазақстан осы мемлекетпен тығыз байланыстарды дамытуға мүдделі", - дейді Н.Назарбаев. Президент атап көрсеткендей, бүгінде екі ел арасындағы тауар айналымы 1,5 миллион долларды құрап отыр. Бұл - мардымсыз көрсеткіш. "Сіздің сапарыңыз екі елдің сауда-экономикалық қарым-қатынастарына оң әсер етеді деген сенім бар", - деп атап көрсетті Мемлекет басшысы.

Бахрейн Королі Хамад бен Иса әл-Халифа өз кезегінде қазақтың қонақжайлығы үшін алғыс айтып, Қазақстан мен Бахрейннің барлық саладағы қарым-қатынастары жаңа серпінмен дамитынына сенім білдірді. "Шағын кездесуімізде атап өткеніміздей, біз екі ел арасындағы қарым-қатынастарды тығыз дамытуға мүдделіміз. Екіжақты қарым-қатынастарды дамыту - біздің ортақ міндетіміз әрі мақсатымыз болып саналады. Көптеген салалар бойынша, атап айтқанда, дипломатиялық, азық-түлік қауіпсіздігі, ауыл шаруашылығы, қаржы, білім беру, ивестициялар салаларында мемлекеттеріміз арасында өзара түсіністік меморандумына қол қойылды", - деді Бахрейн Королі.