Құрылыс басқармасының бастығы пара алу үстінде ұсталды
23 Мамыр 2014, 10:18Қаржы полициясы Солтүстік Қазақстан облысы әкімдігінің қызметкерлері арасында қызмет бабын асыра пайдаланып, бюджет қаражатын жымқыру әрекеттерін, сондай-ақ пара алу фактілерін анықтады, деп хабарлайды Tengrinews.kz тілшісі ҚР Экономикалық қылмысқа және сыбайлас жемқорлыққа қарсы күрес агенттігінің (қаржы полициясы) баспасөз қызметіне сілтеме жасап.
Атап айтқанда, қаржы полицейлері облыс әкімдігіне қарасты құрылыс басқармасының бастығы Ратмир Усмановты пара алу үстінде ұстады. Ол кәсіпкердің мүддесі үшін заңсыз әрекетке барғысы келген. Қаржы полициясының хабарлауынша, бүгінде Солтүстік Қазақстан облысы әкімдігінің бірқатар шенеуніктеріне қатысты қылмыстық істер қозғалды. Олар қызмет бабын асыра пайдаланып, бюджет қаражатын талан-таражға салды деген күдік бар.
Айта кеткен жөн, Р.Усманов Солтүстік Қазақстан облыстық құрылыс басқармасының бастығы қызметіне өткен жылы тағайындалған болатын.
