1. Басты
  2. Біл
  3. Жаңалықтар
  4. Ел жаңалықтары

Қырғызстанмен арадағы шекарада қосымша бекет ашылды

©Тengrinews.kz ©Тengrinews.kz

Қазақстандық туристер үшін Қырғызстан шекарасынан өту жеңілдей түседі. Шекарада қосымша бақылау-өткізу бекеті ашылды, - деп хабарлайды Tengrinews.kz тілшісі Қырғыз Республикасы Мемлекеттік шекара қызметінің қоғаммен және БАҚ-пен байланыс жөніндегі бөліміне сілтеме жасап.

Қосымша бекет Ыстықкөл облысының Түп ауданындағы Шарқұдық шатқалында ашылып отыр. Оны ашудағы мақсат - туристік маусымды тиімді ұйымдастыру және тау туризмін дамыту. Бекет 17 шілдеден 1 қыркүйекке дейін жұмыс істейді. Тау туризмі желісі бойынша халықаралық туристік топтар "Қарқыра-автодорожный" бекетінен тыс Қарқыра өзені үстіндегі көпірмен өткізілетін болады. Бірақ ол туристік компаниялармен алдын ала келісім мен жоспарланған кесте бойынша іске асырылады. Бұл туралы келісім Қырғызстан мен Қазақстан премьер-министрлерінің 12 шілдедегі кездесуі кезінде жасалған.

Бұған дейін Қазақстан мен Қырғызстан шекарасында туристер, автокөліктер мен жүктердің кептеліп жататыны хабарланған еді. "Ақ жол" - "Қордай" бақылау-өткізу бекеті ары-бері өтушілердің нөпірін игере алмай қалған.