Әлеуметтік желілерде Бурабайдағы дәмханалардың бірінде бірнеше бургер үшін 200 мың теңгеге жуық қаражат төленгені қызу талқыланып жатыр. Туризм және спорт министрі Ербол Мырзабосынов бұл жағдайға қатысты пікір білдірді, деп хабарлайды Tengrinews.kz.
Үкіметте өткен брифинг кезінде журналистер Қазақстанның туристік аймақтарындағы баға мәселесіне назар аударды. Бұған әлеуметтік желіде тараған видео себеп болды: Бурабайдағы мейрамханалардың бірінде қыздар жеген бургері үшін шамамен 200 мың теңге төлегені көрсетілген.
Instagram-дағы бұл жарияланымды көру
Осыған байланысты министрден: "Жергілікті шипажайлар мен демалыс орындарында демалу, тіпті жай ғана тамақтану қазақстандықтар үшін тым қымбат болып бара жатқан жоқ па?" - деп сұралды.
Мырзабосынов туристік бағыттарда баға сегменті әртүрлі екенін атап өтті.
"Егер Бурабай туралы айтар болсақ, ол жерде баға деңгейі әртүрлі. Мүмкін, бұл келушілер премиум-сегментте демалған шығар. Жалпы алғанда, кез келген бюджетке лайықты ұсыныстар бар", - деді министр.
Шенеуніктің айтуынша, таңдау туристердің өз қалауына байланысты.
"Бұл - әр туристің жеке таңдауы. Әр бюджетке сай тиісті сегмент бар, оны турист өзі таңдайды", - деп толықтырды ол.
