Tengri FM Радиосы Радио Жұлдыз FM Қазақстан заңдары Экономика сабақтары
KZ RU EN
Бізге жазба жолдау +7 (727) 388 8124
искать через Tengrinews.kz
искать через Google
искать через Yandex
USD / KZT - 332.58
EUR / KZT - 390.38
CNY / KZT - 49.85
RUB / KZT - 5.63

Назарбаев арнаулы мақсаттағы бөлімшелердің дайындығын тексерді

29 Сәуір 2016, 16:10
0
© Akorda.kz
© Akorda.kz

Қазақстан Президенті Нұрсұлтан Назарбаев Ішкі істер министрлігінің арнаулы мақсаттағы бөлімшелерінің Жауынгерлік және әдістемелік даярлау орталығының негізгі нысандарын қарап көрді, сонымен қатар, Мемлекеттік күзет қызметінің "Қалқан", Ұлттық ұланның "Бүркіт", Ішкі істер министрлігінің "Сұңқар",  Ұлттық қауіпсіздік комитетінің "Арыстан", Алматы қаласы Ішкі істер департаменті мен Қорғаныс министрлігінің бас барлау басқармасының "Арлан" арнаулы мақсаттағы бөлімшелерінің күштері мен құралдарын қатыстырған оқу-жаттығу барысын бақылады, - деп хабарлайды Tengrinews.kz тілшісі Ақорданың ресми сайтына сілтеме жасап.

Жаттығу барысында антитеррорлық бағыттағы іс-шаралар өткізу кезіндегі арнаулы мақсаттағы бөлімшелердің іс-қимылы пысықталды.

"Қайсар-2016" жаттығуына қатысушыларға сөз арнаған Мемлекет басшысы жаңа Жауынгерлік және әдістемелік даярлық орталығының сарбаздар шеберлігін шыңдауға мүмкіндік бере отырып, оларды сапалы  оқытуды қамтамасыз ететінін атап өтті.

"Оқу-жаттығуға ұшқыштар мен десанттар, артиллеристер мен барлаушылар, арнаулы жасақ жауынгерлері қатысты. Барлығы да шеберлік пен батылдық танытып, дайындық деңгейі жоғары екенін көрсетті", - деді Нұрсұлтан Назарбаев. 

Қазақстан Президенті соңғы кезде әлемде және өңірде болып жатқан оқиғалар, жер жүзінің әр тарапындағы террорлық актілер, Таяу Шығыстағы әскери қимылдар ықтимал қатерге дайын болу керектігін көрсетіп отырғанына назар аударды. "Қарулы күштердің Отанымызды және мемлекетіміздің егемендігін қорғау, аумақтық тұтастығын сақтау жолындағы маңызы зор", - деді Мемлекет басшысы.

Нұрсұлтан Назарбаев Қазақстан армиясы, өзге әскери құрылымдар, арнаулы органдар Тәуелсіздік жылдары өз дамуының жаңа кезеңіне өткенін айтты.

"Қазақстан тәуелсіздігінің 25 жылдығына дайындала отырып, біз заманауи Қарулы күштерді қалыптастырдық деп айта аламыз. Олар қазіргі заманғы қару-жарақпен және техникамен жабдықталып, кәсіби кадрлармен жасақталып, лайықты деңгейде оқытылады. Қызметтің әлеуметтік жағы айтарлықтай жақсартылды. Осы мәселенің бәріне мен Жоғарғы Бас қолбасшы ретінде ұдайы көңіл бөліп отырмын", - деді Қазақстан Президенті.

Мемлекет басшысы әскери қызметшілердің міндеті еліміздегі тыныштықты, татулық пен келісімді сақтау екенін атап өтті. "Сіздер - даңқты аға ұрпақтың ерлік дәстүрлерінің мұрагерісіздер. Отанымыз сіздерге мемлекет мүддесін жіті қорғау, ұлттық қауіпсіздік пен Қазақстан Республикасының ішкі тұрақтылығының сенімді кепілі болу сияқты айрықша маңызды істі сеніп тапсырды. Бұл сіздерден жоғары машықты ғана емес, қайсарлықты, шынайы патриотизмді де талап етеді", - деді Нұрсұлтан Назарбаев.

Қазақстан Президенті Жауынгерлік ту әскери бөлімнің негізгі әскери белгісі болып саналатынына назар аударды. "Ол әскери қызметшінің адалдығын, ерлігі мен батылдығын бейнелейді. Біздің бабаларымыз Жауынгерлік тумен шабуылға шығып, жеңіске жетті, Отанымызды қорғады.  Бүгін мен жекелеген әскери бөлімдерге біздің айбынымыз бен даңқымыздың рәмізіне айналатын Жауынгерлік ту тапсырамын. Отанымыздың қауіпсіздігін қамтамасыз ету ісіне үлес қоса отырып, бұл байрақты асқақтата ұстаған жөн", - деді Мемлекет басшысы.

Сонымен қатар, Жоғарғы Бас қолбасшы барлық әскери қызметшілерді алдағы Отан қорғаушы күнімен құттықтап, Отан игілігі жолындағы жауынгерлік қызметтеріне сәттілік, елімізге тыныштық тіледі.

Кешенді оқу-жаттығу аяқталғаннан кейін Нұрсұлтан Назарбаев елдің күштік құрылымдарының арнаулы бөлімшелерінің жеке құрамы алдында Ұлттық ұланның 5572-ші әскери бөлімінің және Қорғаныс министрлігінің Бас барлау басқармасының 22750-ші әскери бөлімінің командиріне өз қолымен жауынгерлік ту тапсырды. Сондай-ақ, Қазақстан Президенті қызметте айрықша көзге түскен бірқатар әскери қызметшілерге жаңа пәтердің кілтін тапсырды.


Нравится
Поделиться
Пікір қалдырыңыз
Оқылып жатыр
Талқыланып жатыр
Бүгін
Апта
Ай