+7 (777) 001 44 99
2022 жылы әуе жолаушылар тасымалы 15 пайызға ұлғайды және Қазақстан тәуелсіздік алғалы бері алғаш рет 10 миллион жолаушыдан асты, - деп хабарлайды Kaz.tengritravel.kz тілшісі.
Бүгінгі таңда әуе көлігіндегі жолаушылар тасымалы барлық болжамдардан озып, өткен жылмен қатар пандемияға дейінгі - 2019 жылмен де тұрақты өсім көрсетуде.
Мәселен, 2022 жылғы 11 айдың қорытындысы бойынша қазақстандық әуекомпаниялары тасымалдаған жолаушылар саны 2021 жылмен салыстырғанда 15 пайызға артып, 9,9 миллион жолаушыны құрады (2021 жылы - 8,6 миллион жолаушы; 2020 жылы - 5,0 миллион жолаушы).
Болжам бойынша, 2022 жылғы тасымалданған жолаушылар саны шамамен 10,8 миллионға жетеді деп күтілуде. 2021 жылғы көрсеткіштен өсім - (9,4 млн жолаушы) 15 пайыз.
Қазақстан тәуелсіздік алғалы бері алғаш рет жолаушылар тасымалы 10 миллион жолаушыдан асады.
2022 жылғы қаңтар-қараша айларында отандық әуекомпаниялары ішкі бағыттар бойынша 7 млн жолаушы (2021 жылы - 6,9 миллион, 2020 жылы - 4,1 миллион), халықаралық бағыттар бойынша - 2,9 миллион жолаушы (2021 жылы - 1,7 миллион, 2020 жылы - 0,9 миллион) тасымалдады.
"Air Astana" әуекомпаниясының жолаушылар ағыны шамамен 3,7 миллион адамды, FlyArystan - 3,0 миллионға жуық, SCAT - 2,7 миллион және Qazaq Air - 0,5 миллион адамды құрады.
