Қазақстанда сирек кездесетін жануарлар: жойылып кету қаупі бар түрлер

Қазақстанда биоалуантүрлілікті сақтау мәселесі күн санап өзекті болып барады. Tengritravel.kz Қазақстанның Экология және табиғи ресурстар министрлігінен жойылып кету қаупі төніп тұрған сирек жануарлар туралы білді.

Зоология институты мәліметінше, Қазақстанда жаһандық фаунада толық жойылып кеткен түрлер жоқ, бірақ кейбір популяциялар ел аумағынан жоғалып барады.

"Жойылып кету қаупі төніп тұрған түрлер туралы мәселе күрделі. Егер жойылуды жаһандық фаунадан толық жойылып кету ретінде қарастыратын болсақ, мұндай түрлер қазіргі уақытта Қазақстанда жоқ. Ал егер жануарлар популяциясының Қазақстан аумағынан жоғалуын ескерсек, оларға қызыл қасқырды жатқызуға болады. Қазіргі уақытта ерекше назарды Жетісу бақатісі, балобан-ителгі сияқты түрлерге аудару қажет", – деп атап өтті ведомство өкілдері.

Министрлік мәліметінше, 2023 жылға қарай сирек және жойылып бара жатқан жануарлар тізіміне 227 жануар түрі енгізілген.

"Қолданыстағы қаулы 2006 жылдың 31 қазанында №1034 болып қабылданған. Кейінгі жылдары ол бірнеше рет қайта қаралып, ведомствоаралық зоологиялық комиссияның ғылыми негізделген қорытындылары негізінде толықтырылды. Осы өзгерістердің арқасында тізімге керқұлан, Каспий итбалығы, жолбарыс және қабылан сияқты сирек кездесетін және жойылып кету қаупі бар жануарлар енгізілді", – деп мәлімдеді министрлік.

Сондай-ақ, ведомство Қызыл кітаптың не екенін түсіндірді.

"Қазақстанның Қызыл кітабы – сирек кездесетін және жойылып кету қаупі төніп тұрған өсімдіктер мен жануарлар туралы ақпарат қамтылған, иллюстрацияланған және түсіндірілген басылым. Бұл – табиғатты қорғаудың маңызды құралы, ол осал түрлердің жағдайын бақылауға және оларды сақтау шараларын қабылдауға мүмкіндік береді", – делінген жауапта.

Саяхат қызықтары мен пайдалы ақпаратты Instagram және Facebook парақшаларынан оқи аласыз!