Самұрық-Қазына жалақыны көтереді
Фото spy.kz сайтынан
Сәуір айынан бастап "Самұрық-Қазына" ұлттық әл-ауқат қоры өндіріс қызметкерлерінің жалақысын 10 пайызға көтереді, деп хабарлайды Tengrinews.kz тілшісі басқарма төрағасы Өмірзақ Шөкеевке сілтеме жасап.
"Президенттің тапсырмасына сәйкес, сәуірдің бірінен бастап "Самұрық-Қазынаның" барлық өндірістік персоналы өз жалақысына 10 пайыздық қосымша ақы алады. Осы мақсатта біз 47 миллиард теңгені бөлуді шештік", - деп атап көрсетті бүгін Орталық коммуникациялар қызметінде өткен брифингте "Самұрық-Қазына" қорының басқарма төрағасы Ө.Шөкеев.
Айта кетейік, ақпанның 14-і күні Ақордада өткен Үкіметтің кеңейтілген алқа мәжілісінде Президент "Самұрық-Қазына" қызметкерлерінің жалақысын көтеруге тапсырма берген. "Бірақ тек инженерлік-техникалық персоналға ғана, бір жерде отырған офис қызметкерлеріне емес", - деген болатын Н.Назарбаев. Сондай-ақ Мемлекет басшысы мүмкіндігі шектеулі жандардың жұмысына жағдай жасауды жүктеді. Осы орайда "Самұрық-Қазына" ұлттық әл-ауқат қоры мүгедектерге арналған жұмыс орындарының санын екі есеге арттыруды жоспарлап отыр.