+7 (777) 001 44 99
Тбилисидегі көше музыканттарының қазақстандық туристерді тумен қарсы алып, әнұранды орындауы желіде қызу талқыға түсті. Кейбіреулер мұны қонақжайлылық нышаны деп бағаласа, енді бірі осындай жағдайлардан кейін қонақтардан күтпеген жерден ақша талап етілгені туралы айтып берді. Толығырақ Tengri Travel материалында.
Бәрі қалай басталды?
Талқылауға Белла есімді туристің Тбилиси көшелерінің бірінде түсірген видеосы себеп болды. Оның айтуынша, көше музыканттары оны көріп қалып, бірден аспаптарда ойнай бастаған.
"Біз осы жолмен келе жатқанбыз. Олар жол жиегінде отыр екен. Мені көре сала бірден бастап кетті. "Тоқтаңыз" деді. Мен тоқтадым, тіпті сәл өтіп кетіп едім, бірақ олар ойнай берді. Өзім актриса, әнші әрі музыкант болғандықтан, әріптестерімнің өз өнерін көрсетіп жатқанына бейжай қарай алмадым", - дейді ол.
Instagram-дағы бұл жазбаны көру
Кейін музыканттар Қазақстанның туын шығарған.
"Сосын артыма бұрылсам, олар туды шығарыпты. "Жоқ, мүмкін емес" деп ойладым. Тек ойнап қана қоймай, өзім құрметтейтін елдің туын алып шықты. Мен кері қайтып, туды қолыма алып, соңына дейін тыңдадым", - деп бөлісті ол.
Бұл ретте қыз одан ешқандай ақы талап етілмегенін айтады.
"Әрине, олар ақша сұраған жоқ, өйткені менің грузин гидім менің қазақ емес екенімді айтты. Кейбір пікір қалдырушылар "абай болыңыз, олар сізді жібермейді, ақша сұрайды" деп жазғандай ештеңе талап етпеді", - деді Белла.
Дегенмен видео астындағы пікірлерде қолданушылар мұндай сәттілік бәрінде бола бермейтінін ескерткен.
Қазақстандықтардың тәжірибесі
Алайда барлық туристің алған әсері бірдей емес. Алматылық Наталья (кейіпкердің өтініші бойынша есімі өзгертілді) 2024 жылы осындай жағдайға тап болғанын айтты.
"Бұл Тбилисиде болған еді. Күкірт моншалары жанындағы сарқырамаға бара жатқанбыз, жай қыдырып жүрдік. Кенет бізге екі ер адам келді, жылы жүзді, ақжарқын, әңгімешіл екен. "Қайдан келдіңіздер?" деп сұрады. Біз "Қазақстаннанбыз" дедік", - дейді ол.
Бастапқыда қыздарға бұл қонақжайлылықтың көрінісі сияқты көрінген.
"Біз күлімсіреп тұрмыз, көшедегі қызықты сәт, халықтар достығы дегендей, жақсы болды деп ойладық", - дейді ол.
Скриншот: Threads
Бірақ өнер көрсетіп болғаннан кейін музыканттар күтпеген жерден төлем талап етті — шамамен 16 мың теңге. Қыздар қолма-қол ақшалары жоқ екенін айтқанда, оларды картамен төлеу үшін көрші кафеге апармақ болған.
"Ақсақал мүлдем сасқан жоқ, картамен төлеуіміз үшін бізді тура іргедегі кафеге бастап барды. Міне, сол кезде мен мұның сүйкімді туристік эпизод емес, әбден ойластырылған көше бизнес-жоспары екенін түсіндім", - деп бөлісті Наталья.
Туристің айтуынша, айтылған соманы төлеуден бас тартқан соң, музыканттар қасарыса бастаған.
"Музыкант кейіп: "сендер Қазақстаннансыңдар, ақшаларың бар, ал біз мұнда костюм киіп терлеп жүрміз" дей бастады. Олар өз өнерін "бір таяқ кәуаптың құнымен" теңестірді. Содан кейін терминал ұстаған қыз келгенде, ол бәрін келісіп қойғандай және біз түсінбей тұрғандай, оған 16 мыңды басуды бұйырды", - дейді турист.
Жанжал тек полиция шақыратынын айтып қорқытқанда шешілген.
"Бір сәтте ол дауыс көтере бастады, сонда мен: "не қазір полиция шақырамын, не 5 мың төлейміз де, осымен тоқтатамыз" дедім. Ол, әрине, риза болған жоқ, ашуланды, бірақ келісті. Соңымыздан қалмай қойған соң 5 мың теңге төледік", - деді ол.
Туристер не нәрсеге назар аударуы керек?
Осы оқиғадан кейін қазақстандық әйел саяхатшыларға, әсіресе бейтаныс жандар сіздің Қазақстаннан екеніңізді естігенде ерекше қонақжайлылық танытса, сақ болуға кеңес берді.
Оның айтуынша, музыкалық нөмір, ту және видеоға түсіру туралы өтініштен кейін нақты шот ұсынылуы мүмкін. Егер әртіс өнерінің ақылы екенін алдын ала ескертпесе, қарым-қатынасты бастамас бұрын мұны бірден анықтап алған жөн.
Банк картасын бөгде адамдарға бермей, төлем жасау үшін бейтаныс адамдардың соңынан еріп кафе немесе дүкенке бармаған жөн.
