Витас қазақ тілінде мәлімдеме жасады

Танымал әнші Витас қазақ тілінде мәлімдеме жасады, - деп хабарлайды Tengrinews.kz тілшісі. 

Өзінің Instagram желісіндегі парақшасында әнші қазақтілді аудиторияға арналған пост жазды. Айта кетейік, мәлімдеменің қателері бар, бірақ қазақ тілін түсінетін адам Ресей әншісінің не айтқысы келгенін бірден аңғарады. 

Соңғы бес күн бойы, Мен күн Қазақстаннан достары көп қараңыз! Мен осы шуақты елге сүйемін! Сізді, Қазақстаннан, қымбатты достар көруге қуанышты!

Ғаламтордағы translate.google.com сайтының аудармасы бойынша, тура осы сөйлемдер орыс тіліне былай аударылады екен: За последние пять дней, я вижу много друзей из Казахстана! Я люблю эту солнечную страну! Вы, Казахстан, дорогие друзья, рады видеть Вас!

Еске салайық, бірнеше күн бұрын ресейлік әнші Витас ресми түрде мәлімдеме жасаған болатын. "Қымбатты достар! Ресми мәлімдеймін: соңғы төрт күнде менің тарапыма әлеуметтік желілерде жағымсыз пікірлер тым көп айтыла бастады. Мен кез келген шығармашылыққа, әрбір шығармашылық адамғ құрметпен қарайтынымды айтқым келеді. Сот органдарына жүгінуге немесе сараптама жасауға, бөтеннің мүлкіне таласуға, басқа әртістердің шығармашылық өміріне я өнеріне араласуға бейім адам емеспін. Ешқашан бұлай жасамаймын да", - деп жазды Витас. 

Сонымен қатар, ол кез келген әртістің айналасындағы құқықтар қайшылығы жайлы мәселенің белгілі бір елдің мүддесін қорғайтын продюсердің және компанияның құзыреті екенін айтып отыр.

"Заң бойынша даулар болған да, болады да және танымал орындаушыларға қатысты мұндай мәселелердің шығуы- қалыпты жағдай, бірақ бұл жағымсыз пікірге, қақтығысқа, әсіресе қорлауға себеп болмауы керек", - деп жазды Витас парақшасында.

Айта кетейік, ресейлік әнші бұл жазбасында ешкімнің аты-жөнін атамағандықтан, нақты қандай оқиға жайлы айтып отырғаны анық емес. Алайда, осының алдында оның продюсері Сергей Пудовкин қазақстандық әнші Димаш Құдайбергеновтің Қытайдағы I am a Singer жобасында Витастың "Опера №2" әнін рұқсатсыз орындағанына наразылық білдірген болатын. Ал мұның алдында Қытайдағы адвокаттар конторасына авторлық құқық ісі бойынша шағым түсірілген де болатын.

Жақында авторлық құқықтар жөніндегі сарапшы Темірлан Төлегенов Витастың "Опера №2" композициясын орындаған Димаш Құдайбергеновке шағым айта алмайтыны жайлы айтқан еді. Маманның айтуынша, Витас өз әндерінің байқауларда орындалуына тыйым сала алмайды. Сондай-ақ, Төлегеновтің айтуынша, авторлық құқықты қорғау туралы шағымдар әдетте сотқа жете бермейді.

Сондай-ақ, осыған дейін Лаки Кесоглу Витас пен Димаш Құдайбергеновтің "Опера №2" әнін орындауын салыстырған болатын. Халқы әртісі Димаштың даусы музыка тілінде қалай аталатынын айтты. "Димаштың даусы сирек. Оның дауыс түрі тенор альтино немесе контртенор деп аталады. Ол классика жанрында дами алады. Бірақ ол мұны қаламайды. Әлемде контртенорлар саусақпен санарлық. Олар танымал емес, бірақ бар", - деген еді Лаки Кесоглу.

Еске сала кетейік, Димаш Құдайбергенов 28 қаңтарда Қытайда өтіп жатқан I Am a Singer музыкалық конкурсының екінші кезеңінде де жеңімпаз атанған болатын. Әнші ресейлік атақты Витастың "Опера 2" атты туындысын орындаған еді. Видеоны мына жерден көруге болады. 

Ал телешоудың бірінші кезеңінде әнші SOS d'un terrien en détresse әнін француз тілінде орындап, жеңімпаз атанған болатын. Айта кетейік, Димаш Құдайбергенов қатысып жатқан конкурста 14 кезең бар. Конкурс Қытайдың Чанша қаласында өтіп жатыр.