Елімізде министрлер қандай костюм киіп жүр?

10 Қазан, 11:39
0
© Тұрар Қазанғапов
© Тұрар Қазанғапов

Қазақстан Президенті Нұрсұлтан Назарбаев биылғы Жолдауында үкіметтегілерді осы күнге дейін отандық өндіріске немқұрайлы қарап келгені үшін сынға алған болатын. Осы ретте "Еуразия" телеарнасының тілшілері Елбасының сөзіне көз жеткізу үшін министрлер кабинеті мүшелерінің қандай костюм киіп жүргенін зерттеп көрді.

"Сіздердің үстеріңізге киген шетелдік костюмдеріңізді шешіп алсақ, жалаңаш қаласыңдар. Біздің елімізде де сапалы киім шығара алады. Мен өзім тек отандық өнімді қолданамын. Сапалы әрі он есе арзан. Өзімізді қолдау керек!"- деген еді Нұрсұлтан Назарбаев.

Телеарнадағылардың мәліметінше, білім саласындағы реформалармен басы қатып жүрсе де бас мұғалім отандық костюмді киеді екен.

"Міне, отандық костьюм. QLP. Алматыда жасалған", - дейді білім және ғылым министрі Ерлан Сағадиев.

Отандық өнімді қолдауға бөлінген қаржы, ел экономикасының ахуалын Ерболат Досаевтен артық ешкім білмейтін шығар. Қанша жылдан бері Үкіметтің айналасында жүр. Бірақ гардеробында бірде бір отандық киім жоқ екен.

"Импорт, әлі көрген жоқпын", - дейді премьер-министрдің орынбасары Ерболат Досаев.

"Производство наше", - деді премьер-министрдің орынбасары Асқар Жұмағалиев.

"Кейбір кезде елден аламыз, кейбірде шетелге командировкаға барғанда аламыз. Енді Елбасы айтқаннан кейін біздің өндірушілерге көңіл бөле бастаймыз", - дейді ақпарат және коммуникациялар министрі Дәурен Абаев.

"Мен осы жерде тігемін Астанада. Императорский дом бар ғой, сол жерде", - дейді мәдениет және спорт министрі Арыстанбек Мұхамедиұлы.

Нұрсұлтан Мағзомов бизнес саласы бойынша шетелде білімін шыңдапты. Жат жерде жүріп өзге жұрттың киім үлгісіндегі талғамын байқаған. Елге келген соң дәл сондай отандық бренд тауарын шығаруға бел буған. Қазір Қазақстан бойынша 10 бутигі бар. Тіпті Ресейден де ашыпты.

"Мәскеуден келген кезде импорттық костьюмдердің қымбат екенін байқадық. Ал арзан бағадағы киім ұнамады. Содан соң осыны неге өзіміз тігіп алмаймыз деген ой келді. Басында он шақтысын тігіп киіп алған кезде қызыққандар, сұрай бастағандар көбейді", - дейді кәсіпкер Мағзомов.

"Солардың біріне біз де барып көрдік. Костюмдердің бағасы 75 мың теңгеден басталады. Себебі, елде тігілгенімен, материал сырттан келеді. Мына тауардың бәрі отандық өнім екен. Міне, киініп шықтым. Үстімедегінің бәрі отандық өнім. Мына костюм 99 мың, көйлек 11 мың. Белбеу 12 мың, галстук 9 мыңнан басталады. Сонда тұтас киініп шығу үшін 130 мың теңгеден аса қаржы кетеді. Егер аяқ киім алсаңыз, туфлилер 37 мың теңдеген тұр", - деп есептеп көрді телеарна тілшілері.

Олардың сөзіне қарағанда, алдағы үш жылда өңдеу өнеркәсібі мен мен шикізаттық емес экспортты қолдау үшін қосымша 500 миллиард теңге бөлінеді.

Получить короткую ссылку


Нравится Поделиться
Пікір қалдырыңыз
Оқылып жатыр
Талқыланып жатыр
Бүгін
Апта
Ай