Сарапшы багаж салмағының артып кетуіне әкелетін 5 негізгі қателікті атады

Жүк жинау бойынша сарапшы Лидия Мансел жолға шығарда багаждың үнемі артық шығуына себеп болатын бес қателікті атап өтіп, неге мінсіз демалыс бос чемоданнан басталатынын түсіндірді, деп хабарлайды Tengri Travel тілшісі Travel + Leisure-ке сілтеме жасап

Манселдің айтуынша, бұрын ол үшін сапар алдындағы ең үлкен стресс - зат жинау болған. Уақыт өте келе, көптеген сапар мен түрлі әдісті сынап көрудің нәтижесінде ол заттарды аз алып, жолда өзін еркін сезінуге көмектесетін жүйе қалыптастырған.

"Сеніңіздер, егер сапарға нақты жоспармен шықсаңыз, бұл багаждың жеңіл болуын, стресстің азаюын және киетін ештеңе жоқ сияқты көрінетін жағдайлардың болмауын қамтамасыз етеді", - деп атап өтті ол.

№1 қателік. Капсулалық гардеробтың болмауы

Сарапшы ең көп таралған алғашқы қателік ретінде капсулалық гардероб қағидаларынан бас тартуды атады. Бұл - бір-бірімен оңай үйлесетін және әртүрлі жағдайға жарай беретін әмбебап киімдер жиынтығы.

Маманның айтуынша, оның гардеробында бейтарап түсті және классикалық пішімдегі сапалы базалық киімдер пайда болғаннан кейін, жиналу процесі әлдеқайда жеңілдеген. Ол киімді көп алғанша, бір-бірімен үйлестіруге болатын бұйымдарды таңдай бастаған.

"Қазір шкафымда барлық мезгілге арналған әмбебап киімдер болғандықтан, зат жинау кезінде не таңдарымды білмей қиналатын сәттер сирек кездеседі", - деді ол.

Мұндай тәсіл чемоданға "керек болып қалар" деп салынатын артық заттардан бас тартуға мүмкіндік береді.

Фото: depositphotos.com

№2 қателік. Реттеу қапшықтарына мән бермеу

Сарапшының пікірінше, екінші қателік - багажға арналған арнайы органайзерлерді немесе "packing cubes" деп аталатын құралдарды пайдаланбау.

Оның айтуынша, мұндай аксессуарлар киімдерді жиынтық немесе санат бойынша бөлуге және қанша зат алу қажеттігін нақты түсінуге көмектеседі.

Бұған қоса, органайзер ішіндегі шектеулі орын шешім қабылдағанда ойлануға мәжбүрлейді.

"Егер екінші свитер немесе үшінші шалбар қапқа сыймай жатса, оларды үйде қалдырған дұрыс", - дейді сарапшы.

Сондай-ақ ол үйге оралғанда заттарды тезірек ретке келтіру үшін кір киімдерге арналған қосымша органайзер алуға кеңес берді.

№3 қателік. Қол жүгін дұрыс таңдамау

Тағы бір мәселе - қол жүгіне арналған чемоданның дұрыс таңдалмауы.

Маман тек қол жүгімен саяхаттау қағидасын ұстанатынын, бірақ бұл міндетті түрде ең кішкентай сөмкені пайдалану дегенді білдірмейтінін айтты. Керісінше, рұқсат етілген көлемді тиімді пайдалануға мүмкіндік беретін сыйымды әрі сенімді чемодан таңдау маңызды.

Оның сөзінше, түрлі модельді сынап көргеннен кейін ол багаждың сапасы мен сыйымдылығы жиналу ыңғайлылығына тікелей әсер етеді деген қорытындыға келген. Тар чемоданмен ең қажетті заттардың өзіне орын таппай қиналасыз.

Фото: depositphotos.com

№4 қателік. Жеке сөмке

Көптеген саяхатшы қол жүгінен бөлек бортқа алуға болатын жеке сөмке мүмкіндіктерін ұмытып кетеді.

Сарапшы мұндай аксессуарды багажды жүйелеудің маңызды элементі деп санайды. Оған аяқ киімді, косметиканы, ноутбукті, қуаттағыштарды және көп орын алатын немесе әрқашан қолжетімді болуы тиіс басқа да заттарды салуға болады.

"Мен жеке сөмкені қолдануды құптаймын, өйткені оған чемоданда тым көп орын алатын көлемді немесе қатты заттарды салуға болады", - деп түсіндірді ол.

Автордың пікірінше, заттарды чемодан мен жеке сөмкеге сауатты бөлу багаждың шамадан тыс ауыр тартуынан сақтайды.

№5 қателік. Жүйенің жоқтығы

Қателіктер тізімін косметика мен гигиеналық құралдарды сақтау және тасымалдаудың алдын ала ойластырылған стратегиясының жоқтығы түйіндейді.

Сарапшы бұрын сусабын, кондиционер және басқа да өнімдерді жолға арналған шағын ыдыстарға құйып әуре болғысы келмегендіктен ғана багаж өткізуге мәжбүр болғанын айтты.

Алайда уақыт өте келе ол бұл мәселені алдын ала шешуге болатынын түсінген. Қазір оның қолында қажетті құралдардың шағын нұсқалары, сұйықтықтарға арналған кішкентай контейнерлер мен косметика сынамаларын сақтайтын бөлек орын әрқашан дайын тұрады.

"Косметика жинайтын уақыт келгенде, мен қажетті заттарды алып, жолға шыға беремін - багаж тапсырудың еш қажеті жоқ", - деп түйіндеді сарапшы.

Фото: depositphotos.com

Басты ереже

Түрлі лайфхактың танымалдығына қарамастан, маман чемоданды мінсіз жинаудың әмбебап әдісі жоқ екенін айтты. Оның ойынша, сапарға сәтті дайындалу үшін уақыт бөліп, алдын ала жоспарлау қажет.

Заттарды таңдағанда сапар бағытын, ауа райы болжамын және жоспарланған бағдарламаны ескерген жөн. Сарапшы пікірінше, дәл осындай тәсіл жүкті азайтуға және саяхатты барынша жайлы етуге көмектеседі.

Тағы оқыңыз: Мінсіз чемодан: демалысқа не алу керек және не жиі ұмытылып қалады?