Коронавирус жұқтырған Тимошенконың жағдайы ауыр - баспасөз хатшысы

Украиналық "Батькивщина" партиясының басшысы Юлия Тимошенко коронавирус жұқтырды. Жағдайы ауыр. Бұл туралы саясаткердің баспасөз хатшысы Марина Сорока Facebook желісіндегі парақшасында жазды, - деп хабарлайды Tengrinews.kz тілшісі.

23 тамызда украиналық БАҚ Тимошенко және оның отбасы мүшелері, атап айтқанда қызы мен күйеу баласы COVID-19 жұқтырды деген ақпарат таратты. Алайда мәліметті ешкім ресми түрде растамады.

"Батькивщина" фракциясындағылар басшыларының ауруын жоққа шығарды. 

"Мен онымен бірнеше күн бұрын сөйлестім, аман-есен, олай деп санайтындай ешқандай себеп жоқ. Менің біліуімше, Юлия Владимировна коронавирус жұқтырған жоқ", - деді фракция депутаты Михаил Цимбалюк APnews басылымына берген сұхбатында.

Бірақ саясаткердің баспасөз хатшысы оның коронавирус жұқтырғанын растады.

"Иә, өкінішке қарай, бұл - рас. Тест Юлия Владимировнаның COVID-19 жұқтырғанын растады. Жағдайы ауыр. Дене температурасы 39-ға дейін. Күресіп жатыр" - деп жазды Сорока.

Қазақстан жаңалықтары. Соңғы жаңалықтар. Telegram желісінде бізге жазыл!