Бүгін Сочи Олимпиадасында екі спортшымыз өнер көрсетеді

Бүгін Сочи Олимпиадасында жеті медаль сарапқа салынатын болады. Спортшылар бобслей, биатлон, фристайл, мәнерлер сырғанау, сноудборд және шаңғы акробатикасынан жүлдеге таласатын болады деп хабарлайды Tengrinews.kz Vesti.kz спорт порталына сілтеме жасап. Жарыстың оныншы күні Қазақстан құрамасы спорттың бір түрінен ғана сынға түседі. Астана уақытымен 19,45-те басталатын шаңғы акробатикасында Сергей Берестовский мен Бағлан Іңкәрбек бүгін ел намысын қорғайтын болады. Бұл сайысты тікелей эфирде KazSport арнасы көрсетеді. Сондай-ақ бүгін Сочидегі қысқы Олимпиада ойындары барысында хоккейден әйелдер арасындағы жартылай финалдық кездесу өтеді.