Футзалдан Қазақстан құрамасы әлемнің үздік командасы атануы мүмкін

Футзалдан Қазақстан құрамасы әлемнің үздік командасы атағынан үмітті, - деп хабарлайды Vesti.kz "Қайрат" мини-футбол клубына сілтеме жасап.

"Futsalplanet үздік ұлттық команда атағынан үмітті құрамалардың тізімін жариялады. Олардың арасында Қазақстан құрамасы да бар, ол биыл Сербияда Еуропа чемпионатының қола жүлдесіне ие болған еді, енді Колумбиядағы әлем чемпионатына өтуге мүмкіндігі бар", - делінген хабарламада. Қазақстан құрамасынан басқа бұл тізімде Аргентина, Бразилия, Бразилияның әйелдер құрамасы, Венгрия, Иран, Словения, Испания, Ресейдің әйелдер құрамасы мен Украина құрамасы бар.

Айта кетейік, бұған дейін футзалдан Қазақстан құрамасы мен "Қайраттың" қақпашысы Игитаның әлемнің үздік қақпашысы атағынан үмітті екені айтылды.