Әлем чемпионы Қайрат Ералиев үйленді

Әлем чемпионы Қайрат Ералиев үйленді, - деп хабарлайды Тengrinews.kz тілшісі Vesti.kz спорт сайтына сілтеме жасап. 

Қайрат пен Әсем Ералиевалардың неке қию рәсімі 21 қыркүйекте Шымкентте өтті. Боксшының тойына Қазақстан құрамасындағы әріптестері барды, олардың ішінде Олимпиаданың екі дүркін күміс жүлдегері Әділбек Ниязымбетов, 2016 жылғы Олимпиаданың қатысушысы Берік Әбдірахманов және тағы басқалары бар.

Айта кетейік, 26 жастағы Ералиев 2017 жылы Гамбургте алтын медаль алған жалғыз қазақстандық болды. Бұған дейін халықаралық аренадағы жарыстарда ол қола медальді місе тұтып жүрген еді. 2016 жылы Ералиев Олимпиада ойындарына қатысып, 1/8 финалда сол кезде қола медаль жеңіп алған өзбекстандық Муроджон Ахмадалиевке есе жіберген болатын.