"Канело" орта салмақтағы ең мықты екі боксшыны атады

Орта салмақта WBC, WBA (Super) чемпионы мексикалық Сауль "Канело" Альварес (51-1-2, 35 КО) дивизионындағы үздік екі боксшыны атады, - деп хабарлайды Vesti.kz порталы BoxingScene.com басылымына сілтеме жасап. 

"Канелоның" айтуынша, мұндай атаққа оның өзі және келесі қарсыласы IBF чемпионы америкалық Дэниэл Джейкобс (35-2, 29 КО) лайықты екен.

"Біздің орта салмақтағы ең мықты боксшы екеніміз - нағыз шындық. Джейкобс - әлем чемпионы, тамаша боксшы. Мақсатым - мықтылармен жұдырықтасу. Дэниэл - бойынан мін табу қиын, салмақты қарсылас. Бапкерім Эдди Рейносо мұндай боксшыға қарсы не істеу керегін біледі, менің міндетім - тыңдау және орындау. Егер импровизация қажет болса, істеймін", - деді Альварес.

Альварес пен Джейкобс арасындағы белбеулер біріктірілетін жекпе-жек 4 мамырда Лас-Вагастағы T-Mobile аренасында өтеді. Екі боксшы да белбеулерін алғаш рет қорғайды. 

Айта кетейік, бұрындары екі боксшы да осы салмақта қазақстандық Геннадий Головкинмен жұдырықтасқан. 

Уалихан Қосанбай