Қазақстандық боксшы әлем біріншілігіндегі жеңісінен кейін пәтер алды

Ресейде бокстан өткен әлем біріншілігі-2019 жарысында алтын медальды қанжығасына байлаған қазақстандық боксшы Бекзат Нұрдәулетов Ақтау қаласында екі бөлмелі пәтердің кілтіне ие болды, - деп хабарлайды "Маңғыстау ТВ".

Чемпион мен оның бапкері Марат Жақиевті Маңғыстау облысының әкімі Серікбай Трұмов қабылдады. 

Боксшының бірінші бапкеріне үш миллион теңгелік сертификат табысталды, ал оның қазіргі жаттықтырушысы Жақиевке - бес миллион теңге берілді. 

Айта кетейік, Нұрдәулетов 81 келіге дейінгі салмақ дәрежесінде әлем чемпионы атанды. Ол Қазақстан құрамасының қоржынына түскен жалғыз алтынның иесі атанды.