Қазақстандық боксшы кәсіби рингтегі тұңғыш кездесуінде бірінші раундта жеңіске жетті

Кәсіби алаңға бірінші рет шыққан қазақстандық боксшы Айдос Ербосынұлы жеңіске жетті, - деп хабарлайды Vesti.kz.

Порталдың мәліметінше, өзінің кәсіби рингтегі бірінші кездесуін Львовта (Украина) өткізген Ербосынұлы Беларусь боксшысы Андрей Долгожиевпен (8-12-1, 6 КО) жұдырықтасты. Ол қарсыласын мерзімінен бұрын, нақтырақ айтқанда, бірінші раундта жеңіп шықты. Жекпе-жекте алты раунд болған еді.

ВКонтакте желісіндегі боксшы тобының жазуынша, Айдос Ербосынұлы 1991 жылы 11 қарашада туылған. Ол бірқатар халықаралық жарыстардың жеңімпазы, спорт шебері. Соңғы кездері 75 келі салмақта Astana Arlans құрамында Қазақстанның намысын қорғап жүр. Ол болашағы зор боксшылардың бірі деп есептеледі. Айдос Шугар Рэй Робинсон мен Рой Джонсты пір тұтады.