Қазақстан мен Қырғызстан Шымкентте арнайы операция жүргізді

Шымкентте ауған апиынын жеткізудің халықаралық арнасына қатысы бар деген күдікпен Қазақстанның екі азаматы ұсталды. Операцияны Қазақстан мен Қырғызстанның құқық қорғау органдары жүргізді, деп хабарлайды Tengrinews.kz тілшісі Polisia.kz порталына сілтеме жасап.

Күштік құрылымдар не тапты?

ІІМ мәліметінше, бірлескен арнайы операция трансұлттық есірткі трафигінің жолын кесуге бағытталған.

Ұстау барысында күдіктілерден 5 келіге жуық ауған апиыны тәркіленді.

"Бірлескен арнайы операция аясында Шымкент қаласында Қазақстанның екі азаматы ұсталды, олардан 5 келіге жуық ауған апиыны тәркіленді", - деп хабарлады ІІМ Есірткі қылмысына қарсы іс-қимыл комитетінің басқарма бастығы Бақытжан Әмірханов.

Есірткінің заңсыз айналымы фактісі бойынша Қылмыстық кодекстің 297-бабы 3-бөлігіне сәйкес сотқа дейінгі тергеу басталған. Күдіктілер уақытша ұстау изоляторына қамалған.

Сондай-ақ тергеу тарапы ұсталғандардың әрекеттерін есірткі контрабандасы және трансұлттық ұйымдасқан қылмыстық топқа қатысу баптары бойынша қосымша саралау мәселесін қарастырып жатыр.