Қостанай облысында полиция 40 миллион теңгенің есірткісін заңсыз айналымға жібермеді

Қостанай облысында полицейлер құны қара нарықта 40 миллион теңге болатын синтетикалық есірткінің 2 мың дозасын заңсыз айналымға жібермеді, - деп хабарлайды Tengrinews.kz тілшісі Polisia.kz сайтына сілтеме жасап.

Синтетикалық есірткілерді сақтау және тарату күдігі бойынша 35 жастағы ер адам ұсталды. Қызметтік-іздестіру итінің қатысуымен жүргізілген операция Қостанайдағы Киев кентіне қарасты жолда аяқталған.

"Ұсталған адамнан ақ түсті ұнтақты заттың 20 пакеті бар үлкен полиэтилен орамы табылды. Олардың әрқайсы жасыл түсті скотчпен оралған. Hyundai Tucson көлігін тінту барысында ұқсас заты бар 70 шағын пакеті бар тағы 3 осындай орам табылды. Артқы орындықта тағы 35 пакет пен түрлі түсті жабысқақ таспа орамдары болды", - делінген хабарламада.

Сонымен қатар, күдіктінің пәтерін тінту кезінде жуынатын бөлмеде есірткіні орауға арналған бос қаптамалар, ұнтақ салынған целофан пакеті, сондай-ақ электронды таразылар мен өлшеуіш қасықтар табылған.

"Сараптама алынған ұнтақтың жалпы салмағы шамамен 1 келі болатын мефедрон екенін анықтады, бұл шамамен 2 мың дозаға тең. Қара нарықтағы есірткінің құны шамамен 40 миллион теңге болады. Есірткі заттарын сақтау дерегі бойынша аса ірі мөлшерде өткізу мақсатында полиция сотқа дейінгі тергеу жүргізіп жатыр. Күдікті уақытша ұстау изоляторына қамалды", - делінген хабарламада.

Сонымен қатар, полиция оның өзге де осындай қылмыстарға қатысы бар-жоғын тексеріп жатыр. Ер адам 10 жылдан 15 жылға дейін бас бостандығынан айырылуы мүмкін.

Сілтемесіз жаңалық оқисыз ба? Онда Telegram желісінде парақшамызға тіркеліңіз!