Маңғыстау облыстық денсаулық сақтау басқармасының экс-басшысының үкімі өзгерді

Маңғыстау облыстық қылмыстық істер жөніндегі сот алқасы облыстық денсаулық сақтау басқармасының бұрынғы басшысы Марал Қадырдың ісін қарады, - деп хабарлайды "Тумба". 

Айта кетейік, өз қарамағындағылардан ақшалай қаражат жымқырудың төрт дерегі дәлелденгеннен кейін биыл 5 мамырда ол мүлкі тәркілене отырып, жалпы тәртіптегі колонияға 7 жылға бас бостандығынан айырылған болатын. 

Үкім жазаны жеңілдететін жағдайларды негізге ала отырып шығарылған еді, яғни оның кәмелетке толмаған қызы бар. 

" Марал Қадыр сот ҚР Қылмыстық кодексінің 366-бабының 3-бөлігінің 1,4-тармақтары бойынша айыпты деп танып, жеті жылға бас бостандығынан айырылған. Ақтау қалалық сотының 2017 жылдың 5 мамырындағы үкімі өзгерді. Қазақстанның Қылмыстық кодексінің 55-бабының 4-бөлігін қолдану арқылы оған бес жылға бас бостандығынан айыру жазасы тағайындалды. Үкімнің қалған бөлігі өзгеріссіз қалады, сотталушы мен оның қорғаушысының апелляциялық шағымы, сондай-ақ, прокурордың апелляциялық наразылығы қанағаттандырылмады", - деп атап өтті Маңғыстау облыстық сотының баспасөз қызметінің өкілі Гаухар Нұрханова. 

Басылымның мәліметінше, сотталушы мүлкі тәркіленіп қана қоймай, белгілі бір қызметтерге тұрудан өмір бойына айырылды.