Орал мешітінде 370 мың теңге ұрлаған ер адам ұсталды

Алла үйіне иманды жанның кейпінде келіп, сұғанақтық жасаған жігіттің әрекеті мешіт ішіндегі бейнебақылау камерасына түсіп қалды, - деп хабарлайды "КТК" телеарнасы.

Телеарна мәліметінше, 25 жастағы ұры жігіт жаман ойын Оралдағы екі мешітке келушілерге арналған әжетханада жүзеге асырыпты. Яғни келушілер жуынып-шайынып, намаз оқуға кеткенде бұл олардың сырт киімдерінен ақша ұрлаған. Аспай-саспай әрекет еткеніне қарағанда, бейнебақылау камерасының бар екенін білмесе керек. Қазір қамауда отырған бұл жігітке қатысты полицейлер ұрлық бабы бойынша  іс қозғады.

Айта кетейік, жаман әдетті жанына серік еткен жігіт - Атырау облысының тумасы. Бұрын да ұрлық жасағаны үшін сотты болып, абақтыдан жақында ғана шыққан көрінеді.

"Мешітке келіп, құлшылық жасаймын деп ғибадат орындарына келіп, мұндай іс-әрекетке барған тұрақты жамағатымыз емес. Біз құзырлы мекемелерге толыққанды мәселені өткіздік. Қажетті мамандар тартылды, шақырылды. Және осы мешітте зардап шеккен азаматтардың барлығынан арыз өткізілді", - дейді Орал қалалық мешітінің бас имамы Әлімхан Тұрғынбеков (Дереккөз: КТК). 

Желіде тарап жатқан видеоға қарағанда, ер адам мешітке келушілерден 370 мың теңге көлемінде ақшасын алып кеткен. Видеода ер адам осы соманы алғанын растайды.