Оралда әріптесін ұрып өлтірген ер адамға қатысты сот үкімі шықты

Ауыл шаруашылығы министрлігіне қарасты мемлекеттік инспекция комитетінің аймақтағы өкілі Тілек Химедденов ендігі он жылын түзету мекемесінде өткізеді, - деп жазады КТК арнасы.  

Бір жыл бұрын Файзулла Төлегеновтің өлі денесі әріптесінің үйінен табылған. Алғашқыда сарапшылар оны жүрек талмасынан қайтыс болды деген шешім шығарған. Бұған сенбеген марқұмның туыстары қайта тексеруге арыз жазады. Екінші қайтара жүргізген сараптама ауыр соққы болғанын анықтаған.

Сот барысында мемлекеттік  инспекцияның қос қызметкері қайғылы оқиға болған күні жұмыстан ерте сұранып кеткені анықталған. Осылайша, олар Химедденовтің үйіне барып, арақ ішеді. Кейін екеуі төбелесіп қалған. Ал не нәрсеге келісе алмағаны сол күйі айтылған жоқ.

Тілек Химедденов те кінәсін мойындамады. Ол 10 жылға бас бостандығынан айырылып, қаралы отбасыға екі миллион теңге өтеуге міндетті.