Оралдың қақ ортасында оқ атқан күдікті қолға түсті

Баспасөз қызметінің мәлімдеуінше, 20 жасар ер жігіт өз қатесін мойындап, түсінік берген. "Өз түсіндірмесінде ол ұйықтауға кедергі келтіргендіктен, пәтердің балконынан спортты-пневматикалық мылтықтан торғайларға оқ атқанын айтқан", - делінген хабарламада. Ұсталған азаматқа қатысты ҚР ҚК 257 "Бұзақылық" бабы бойынша қылмыстық іс қозғалған. Травматикалық қару тәркіленген. Қазіргі уақытта қылмыстық іс бойынша қажетті сараптамалар тағайындалып, кешенді жедел-тергеу шаралары жүргізілуде. 

Еске сала кетейік, бұл оқиға 16 мамыр күні Құрманғазы көшесінің бойында болған. 32 жастағы әйел жамбасынан жарақат алған. Жәбірленуші Орал облыстық клиникалық ауруханасына жеткізілген. Атылған оқ жанама тигендіктен бірінші медициналық көмектен кейін ол үйіне жіберілген.