Қапшағайда полиция майоры 8 жылға сотталды

Алматы облысы Қапшағай қалалық ішкі істер бөлімі криминалдық полицияның аға жедел уәкілі Азамат Тоқшарановқа қатысты сот үкімі шықты, - деп хабарлайды Tengrinews.kz тілшісі облыс сотының баспасөз қызметіне сілтеме жасап.

Шешімді қылмыстық істер бойынша ауданаралық мамандандырылған сот шығарды.

32 жастағы Азамат Тоқшаранов ҚР ҚК-нің 366-бабының 2-бөлігі ("Пара алу") және 297-бабының 3-бөлігі ("Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу") бойынша сотқа берілді. 

"Сот шешіміне сәйкес, Азамат Тоқшаранов 8 жыл бас бостандығынан айырылды. Ол өмірінің соңына дейін мемлекеттік қызметке тұра алмады және жазасын қылмыстық-атқару жүйесінің орташа қауіпсіз мекемесінде өтейді", - деп хабарлады облыс баспасөз қызметіндегілер.

Сонымен қатар, ол ҚР ҚК-нің 49-бабының 1-бөлігіне сәйкес "полиция мойоры" шенінен айырылды. Бұрындары оның басшысы Ерлан Әлібаев та пара алғаны үшін ұсталып, 90 мың теңге айыппұл арқалаған.