Қаржы мониторингі комитетінің орталық басшылары жемқорлық жасады деген күдікке ілінді

ҚР Қаржы министрлігі Қаржы мониторингі комитетінің Кинологиялық орталығы басшылары жемқорлық қылмыс жасады деген күдікке ілінді, - деп хабарлайды Tengrinews.kz тілшісі Антикоррупция қызметіне сілтеме жасап.

Сыбайлас жемқорлыққа қарсы қызмет Алматы қаласының прокуратурасымен бірлесіп пара алу күдігі бойынша Қазақстан Республикасы Қаржы министрлігі Қаржы мониторингі комитетінің "Кинологиялық орталығы" РММ басшысы мен оның орынбасарын әшкереледі.

Олар бағынышты қызметкерлерінен қызмет бойынша жалпы қамқорлықтары үшін жүйелі түрде 2 миллион 182 мың теңге көлемінде пара алғаны үшін күдікке ілінген.

Биылғы 28 желтоқсанында Алматы қаласының мамандандырылған ауданаралық тергеу сотымен күдіктілерге қатысты қамауға алу түріндегі бұлтартпау шарасына санкция берілді.

Сотқа дейінгі тергеу жалғасып жатыр. Күдіктілердің кінәсінің деңгейі туралы түпкілікті шешімді сот шығарады.