Шымкентте төрт қаржылық пирамиданы ұйымдастырғандар ұсталды

Шымкент қалалық Экономикалық тергеу басқармасы "Өз үйім", "Табыс", "Онлайн Табыс" және GAP қаржы пирамидаларының заңсыз әрекеттерінің жолын кесті, - деп хабарлайды Tengrinews.kz тілшісі қалалық прокуратураның баспасөз қызметіне сілтеме жасап.

Ведомство мәліметінше, пирамидаларды ұйымдастырушылар еліміздің түкпір-түкпірінде қылмыстық әрекеттерді бастап, жүздеген азаматтың сеніміне кірген.

Іс бойынша айыпталушылар жеті күн ішінде 40 пайызға дейін дивидендпен түрлі инвестициялық бағдарламаларға ақша салу бойынша және жылжымайтын мүлік құнынан ең төмен бастапқы жарнамен тұрғын үйді немесе автокөлікті пайызсыз сатып алу жөнінде қолайлы шарттарды жарнамалаған.

Жәбірленушілерге келтірілген шығын бір миллиард теңгеден асады. Шымкент қаласының прокуратурасы үш айыпталушыны сотқа жіберді, олар заң бойынша ұзақ мерзімге бас бостандығынан айырылуы мүмкін.

Қалалық прокуратура азаматтар өз қаражатын күмәнді және тексерілмеген, қомақты қаржы мен үлкен пайда ұсынатын ұйымдарға сенбеу керектігін еске салды.

Сілтемесіз жаңалық оқисыз ба? Онда Telegram желісінде парақшамызға тіркеліңіз!