Шымкентте 9 қылмыстық топ ұсталды

Шымкент полицейлері 46 пәтердің тоналуына қатысы бар тоғыз қылмыстық топты ұстады, - деп хабарлайды Tengrinews.kz тілшісі ОҚО ІІД баспасөз қызметіне сілтеме жасап.

7-13 шілде аралығында Шымкентте "Қауіпсіз қала" жедел-алдын алу шарасы өткізілді. Нәтижесінде 9 қылмыстық топ ұсталып, 73 қылмыс ашылды. Олардың ішінде пәтер тонау, қарақшылық, алаяқтық және автокөлік құралдарын ұрлау деректері бар.

"Сотқа дейінгі тергеу барысында қылмыстық топ мүшелерінің қала аумағында 46 пәтердің тоналу дерегіне қатысы бар екені анықталды. Осы деректер бойынша ҚР Қылмыстық кодексінің 188-бабы ("Ұрлық"), 190-бабы ("Алаяқтық") және 191-баптары ("Тонау") бойынша қылмыстық іс қозғалды. Күдіктілер қамауға алынды", - делінген хабарламада.

Айта кетейік, қылмыстық топ мүшелерінің ішінде Қызылорда мен Тараз қаласының тұрғындары бар.