“Транстелекомнан“ 4 миллиард теңге жымқырылған: күдікті Грузиядан ұсталды

"Транстелеком" АҚ-нан аса ірі мөлшерде қаражат жымқырды деген күдікке ілінген Қазақстан азаматы Грузиядан экстрадицияланды, - деп хабарлайды Tengrinews.kz Бас прокуратураға сілтеме жасап.

Жымқыру схемасы

Тергеу мәліметінше, компаниялардың бірінде басшылық лауазымды атқарған күдікті басқа тұлғалармен алдын ала сөз байласқан. Қаражатты иемдену мақсатында ол мемлекеттік сатып алу процедураларын айналып өтіп, спутниктік және телекоммуникациялық жабдықтарды жалдау туралы заңсыз шарт жасасқан.

Қылмыстық іс-әрекет салдарынан "Транстелеком" АҚ арқылы мемлекетке 4 миллиард теңгеден аса шығын келген.

Ұстау және экстрадициялау

Қылмыс жасағаннан кейін ер адам жасырынып үлгерген, соған байланысты оған халықаралық іздеу жарияланды.

Биылғы наурызда ол Грузия аумағында ұсталды. Қазақстан Бас прокуратурасының сұрауы бойынша ол Отанына экстрадицияланды.

Қазіргі уақытта күдікті тергеу изоляторында отыр.

Тағылған айып бойынша мүлкі тәркіленіп, 12 жылға дейінгі мерзімге бас бостандығынан айыру жазасы қарастырылған.