ҰҚК арнайы операциясы: есірткі арнасымен байланысы бар деген 15 адам ұсталды

ҰҚК арнайы операциялар барысында есірткі құрылымының 15 қатысушысы ұсталды. Заңсыз айналымнан барлығы 223 келі есірткі тәркіленген, - деп хабарлайды Tengrinews.kz тілшісі ҰҚК баспасөз қызметіне сілтеме жасап.

2022 жылғы сәуір мен мамырда ғана ҰҚК Қырғызстан және Өзбекстан елдерінің арнаулы қызметтері және құқық қорғау органдарымен бірлесіп, 30-дан аса есірткіге қарсы операция жүргізген. ҰҚК мәліметінше, есірткі трафигінің 9 халықаралық және 14 өңірлік арнасы жойылған. Синтетикалық есірткі өндіретін 8 ірі жасырын зертхана әшкереленіп, жұмысы тоқтатылған.

"Арнайы операциялар барысында есірткі құрылымының 15 қатысушы ұсталды. Заңсыз айналымнан барлығы 223 келі есірткі, оның ішінде: 90 келі синтетикалық есірткі (270 мың "бір реттік мөлшерге" тең), 85.2 келі марихуана, 14 келі апиын, 4 келі гашиш алынды. Бұдан басқа, 800 экстази таблеткасы, 500 түп "голланд" марихуанасы және психотроптық заттарды дайындауға арналған 4 тонна химиялық реагенттер айналымнан шығарылды", - делінген хабарламада.

2 ай ішінде алынған есірткінің "қара нарықтағы" жалпы сомасы 2.3 миллиард теңгеден астамға бағаланып отыр.

Сілтемесіз жаңалық оқисыз ба? Онда Telegram желісінде парақшамызға тіркеліңіз!