Яна Легкодимова мен Жангелдиндегі отбасының өлімі: атыраулық судья тағы бір атышулы істі қарайды

Атыраулық судья Зарема Хамидуллина 58 жастағы бастауыш сынып мұғалімінің өліміне қатысты кезекті атышулы істі қарап жатыр. Дәл осы судья Яна Легкодимованың қатыгездікпен өлтірілуіне қатысты өмір бойына бас бостандығынан айыру үкімін шығарған болатын, сондай-ақ қазіргі уақытта ол Жангелдин ауылында бір отбасыны өлтірді деп айыпталған күдіктінің ісін қарап жатыр, - деп хабарлайды Tengrinews.kz тілшісі "Ақ Жайық" мәліметіне сілтеме жасап.

Мұғалімнің өлімі

Іс Атырау облысының қылмыстық істер жөніндегі мамандандырылған ауданаралық сотында қаралып жатыр. Қылмыс 17 наурызға қараған түні Нұрсая ықшамауданында болған. Сотталушы орындығында ҚР ҚК-нің 99-бабы 1-бөлігі ("Адам өлтіру") бойынша айыпталған 63 жастағы зейнеткер отыр.

Айыптау материалдарына сәйкес, ерлі-зайыпты арасында ұзақ уақыт бойы қызғаныш пен сенімсіздік салдарынан жанжал туындап келген. Қайғылы оқиға болған түні кезекті ұрыс-керіс күш көрсетуге ұласқан.

Тергеу мәліметтері бойынша, түнгі сағат екі шамасында ер адам ас үй пышағын алып, әйелі мен отбасында тәрбиеленіп жатқан 12 жастағы қыз отырған бөлмеге кірген. Әйел пышақ жарақатын алып, алған жарақаттарынан оқиға орнында көз жұмған.

Куәгерлердің айғақтары

Оқиға кезінде пәтерде болған кәмелетке толмаған қыз негізгі куәгер болды. Оның айтуынша, ол айқай-шудан оянып кетіп, араша түсуге тырысқан, бірақ шабуыл жасалған сәттің өзін көрмеген.

Сотталушының ұстанымы

Сотта ер адам кінәсін толық мойындады. Ол жанжалдан кейін пышақ алып, әйеліне соққы жасағанын растады. Отырыс кезінде сотталушы жылап жіберіп, жәбірленуші тараптан кешірім сұрады. Сондай-ақ ол істі алқабилердің қатысуымен қараудан бас тартты.

Талқылау барысында тараптардың айыптау актісінің көшірмесін алмағаны анықталды. Судья прокурорға ескерту жасады, содан кейін құжаттар тікелей сот залында берілді.

Сот ашық режимде өтіп жатыр. Келесі отырыс 5 маусымда сағат 10:00-ге белгіленген.

Зарема Хамидуллина туралы не белгілі?

Зарема Хамидуллина 1983 жылы дүниеге келген. Хамидуллина сот жүйесіндегі еңбек жолын 2004 жылы Индер аудандық сотының кеңсе маманы қызметінен бастаған.

Ол әр жылдары Атырау облыстық сотының бас маманы, Атырау облысының кәмелетке толмағандар істері жөніндегі мамандандырылған ауданаралық соты кеңсесінің меңгерушісі, сондай-ақ Атырау қалалық соты кеңсесінің меңгерушісі қызметтерін атқарған.

2021 жылғы 27 ақпаннан бастап Зарема Хамидуллина – Атырау облысының Қылмыстық істер жөніндегі мамандандырылған ауданаралық сотының төрайымы.

Яна Легкодимованың ісі бойынша қоғамдық резонанс тудырған үкім

Зарема Хамидуллина Яна Легкодимованың өліміне қатысты сот процесінен кейін танымал бола бастады. 2025 жылғы 17 қарашада ол екі айыпталушыны – 24 жастағы Ризуан Хайржанов пен 25 жастағы Алтынбек Катимовты өмір бойына бас бостандығынан айыруға үкім шығарды.

Үкімді жариялағаннан кейін судья сотталушыларға қаратып айтқан сөздерімен жұртшылықтың назарын аударды. Ол сот залында қаза тапқан қыздың мәйітінің суреттерін көрсетіп, қылмыскерлердің ерекше қатігездігін атап өтті.

"Яна сізді жақсы көрді. Жәбірленушіні қаралай отырып, Ризуан Хайржанов, сіз өз ісіңізді әлі де түсінбегеніңізді және түзелу жолына түспегеніңізді көрсетіп отырсыз. Бірнеше күн бойы сіздер кісі өлтіру тәсілін қатыгездік, келеке етіп және күліп отырып талқыладыңыздар. Сіздерді жәбірленушінің жағдайы емес, тек полицияның қолына түспеу амалы толғандырды. Бүкіл процесс барысында сот сіздің бір ғана уәжіңізбен келісті: сіздердің іс-әрекеттеріңізді ақтауға ешқандай негіз жоқ", – деді судья.

2026 жылғы 24 ақпанда сотталушылар үкімге шағымдануға тырысты, бірақ Атырау облыстық сотының апелляциялық алқасы үкімді өзгеріссіз қалдырды.

Бір отбасының өліміне қатысты іс

Жангелдин ауылындағы бір отбасыны өлтіру оқиғасы 2025 жылғы желтоқсанның аяғында болған еді. Ол кезде туыстары зейнеткер ерлі-зайыпты мен олардың ересек балаларының жоғалғаны туралы хабарлаған еді.

Фото: полицияның баспасөз қызметі

Екі айға созылған белсенді іздестіру жұмыстарынан кейін олардың зорлықпен өлтірілген мәйіттері өз үйінің ауласындағы сарайдың астынан табылды. Адам өлтіру дерегі бойынша тергеу өңірдегі ең резонанс тудырған істердің біріне айналды.

Бір пышақпен бүкіл отбасы өлтірілген. Атыраудағы қайғылы оқиғаға қатысты жаңа деректер

Төрт айдан кейін іс сотқа жетті. Іс бойынша төрағалық етуші судья - Зарема Хамидуллина.