Жамбыл облысында педофилдердің ісін әйелдер тергейтін болды

Жамбыл облысында кәмелетке толмағандарға қатысты жасалған қылмыстарды әйелдер тергейтін болады, - деп хабарлайды Tengrinews.kz тілшісі облыстық прокуратураға сілтеме жасап.

Әйел полицейлерге осындай жұмысты тапсыру қажеттілігі жайлы шешімді прокуратурадағылар мен ІІД өкілдері қабылдаған. Прокуратура органдарындағы тексерістерді де процессуалдық әйел прокурорлар жүргізетін болады.

"Бұл шешім кәмелетке толмағандардың психологиялық ауытқушылықтарының пайда болу қаупін төмендетіп, сондай-ақ, осы категория бойынша зардап шеккендердің сенім деңгейін арттырады", - дейді прокуратура өкілдері.

Еске сала кетейік, осыған дейін Қазақстан Республикасының бас прокуроры Жақып Асанов елімізде сексуалдық сипаттағы қылмыстар бойынша істі әйел прокурорларға беруге шақырған болатын. "Бізде әйелдер көп. Болмаса, жұмысқа қабылдау керек. Бұл шұғыл жасалуы тиіс іс, оны жылдам жасай аламыз. Артық ақылдың да, күштің де қажеті жоқ. Облыс прокурорлары, сіздерге айтып отырмын. Сіздерге мерзім беремін - бір апта ішінде осындай әрбір қылмыс бойынша мұндай істерді ер адамдарға беруді тоқтатыңыздар", - деген еді Асанов.