Франция рекордтық ыстыққа байланысты атом реакторларын тоқтатты

Францияның EDF мемлекеттік энергетикалық концерні рекордтық ыстыққа байланысты алдын алу экологиялық шарасы ретінде екі ядролық реактордың жұмысын уақытша тоқтатты, деп хабарлайды Tengrinews.kz тілшісі Euronews-ке сілтеме жасап.

Францияның EDF компаниясы Сена және Рона өзендеріндегі су температурасының көтерілуіне байланысты су экожүйелерін қорғау жөніндегі экологиялық нормаларды сақтау мақсатында Ножан-сюр-Сен және Бюже атом электр станцияларындағы бірқатар реактордың жұмысын тоқтатты. Компания ағынды судың температурасын бақылауға және флора мен фаунаға зиян келу қаупі туындаған жағдайда өндірісті азайтуға міндетті.

"Францияда электр энергиясына деген сұранысты қанағаттандыру үшін, соның ішінде жекелеген нысандар тоқтаған жағдайда да жеткілікті генерациялаушы қуаттар бар", - деп мәлімдеді RTE энергия жүйесінің оператор компаниясы.

Бейсенбі күні Париждің солтүстігіндегі Ножан-сюр-Сен АЭС пен Лион маңындағы Бюже АЭС-індегі реакторлар ажыратылды. Бұған дейін дүйсенбіде Гаронна өзеніндегі Гольфеш АЭС-інде реактор тоқтатылса, EDF-тің 57 реактордан тұратын паркіндегі бірқатар басқа станцияның қуаты төмендетілді. Өткен жылы олар Франциядағы электр энергиясы өндірісінің 70 пайызға жуығын қамтамасыз етті.

Атом станциялары өзен суын салқындату үшін пайдаланып, оны арнаға сәл жылыған күйде қайтарады. Қатты аптап кезінде операторлар ағынды судың заңмен белгіленген температуралық нормативтерінен асып кетпеуі үшін жүктемені азайтуға немесе блоктарды тоқтатуға міндетті.

Францияның 96 департаментінің жартысынан астамында өмірге қауіпті "қызыл" деңгей жарияланды. Тұрғындарға тікелей күн сәулесінен аулақ болуға және "барынша қырағылық" танытуға кеңес берілді. Météo-France хабарлауынша, 23 маусым, сейсенбі күні 1947 жылы метеобақылаулар басталғалы бергі ең ыстық күн болды.