Баянауылда алапат өрт шықты. Болат Бақауов оқиға орнына барды

Павлодар облысы Баянауыл ұлттық саябағының аумағында алапат өрт шықты, - деп хабарлайды Tengrinews.kz тілшісі. 

Куәгерлер оқиға орнында түсірілген видеоларды әлеуметтік желілерде жариялап жатыр. Instagram желісіндегі ekibas_v_teme парақшасында "алапат өрттің аумағы тым орасан" және "елді мекенге жақындап келеді" деп жазылған.

Жергілікті тұрғындар екінші тәулік бойы өз күшімен өртті сөндіріп жатыр, алайда жел бар еңбекті зая кетірді. Көмек керек", - делінген жазбада.  

Ресми мәлімет бойынша, өрт 22 қыркүйекте күндіз шыққан. Орманды алқапта шөп пен ағаш өртенген. Өрт аумағы шамамен 2,5 гектар. Өрт сөндіруге 100 адам мен 10 бірлік техника жұмылдырылған.

"Алапат өрт шыққаны туралы премьер-министрдің орынбасары Роман Склярға айтылды. Оқиға орнына Павлодар облысының әкімі барды. Сондай-ақ, өрт сөндіруге төрт арнайы техника қосымша жұмылдырылды", - деді облыстық әкімдік баспасөз қызметінің өкілдері.