Жаңаөзен мен Теңгеде желден үйлердің шатыры қирады

Маңғыстау облысының Жаңаөзен қаласы мен Теңге ауылында қатты желдің салдарынан ғимараттардың шатыры қирап қалды, - деп хабарлайды Tengrinews.kz тілшісі inAktau.kz басылымына сілтеме жасап.

Дүлей желдің салдары туралы видео Instagram желісіндегі zhanozen_onlinе парақшасында жарияланды.

Маңғыстау облысы ТЖД баспасөз қызметінің мәліметінше, Жаңаөзенде ауа райының қолайсыздығынан ешкім зардап шеккен жоқ.

"Өркен" шағынауданындағы төртқабатты тұрғын үй шатырының бөлігі құлады – шамамен 70 шаршы метр. Үйдің ауданы - 100 шаршы метр. Ғимарат 1986 жылы салынған", - деді ТЖД бастығының қорғаныс жөніндегі орынбасары Бекболат Әбдіқадыров.

Теңге ауылында №2 емхананың шатыры желден қирап қалған.

"Ешкім зардап шекпеді. Ғимарат 1997 жылы салынған, 2017 жылы күрделі жөндеу жүргізілді. Арнайы комиссия құрылды, құрамында әкімдік өкілдері бар және олар оқиға орнында болды", - деді Маңғыстау облысы ТЖД бастығының орынбасары.

Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!