Оралда кондуктор мен жолаушының төбелесі видеоға түсірілді

Оралда кондуктор автобус жолаушысымен төбелесті, - деп хабарлайды Tengrinews.kz тілшісі. 

Әлеуметтік желіде 19 қаңтарда № 22 бағытында жүретін қоғамдық көліктің салонында түсірілген видео тарап жатыр. Онда кондуктор жолаушыны бірнеше рет соққының астына алып, жұлқылайды.  

Жолаушылар көлігі және автомобиль жолдары бөлімінің өкілдері оқиғаның 19 қаңтарда кешкі сағат беске таман болғанын айтады. 

"Біз кондуктор мен жүргізушіден түсініктеме алдық. Олар жолаушының автобусты белгіленбеген жерде тоқтатуды талап еткенін атап өтті. Тексеру шаралары жүріп жатыр", - деді бөлімнің сектор меңгерушісі Алмаз Ахошев.

Бұл бағытта "Батыс Қазақстан автобус паркі" ЖШС қызмет көрсетеді. Компания өкілдері жүргізуші мен кондукторға сөгіс жариялағанын айтты. Осы оқиғаға байланысты полицияға арыз түспеген.